Baskoniak finalerdietarako txartela nahi du

Laboral Kutxa taldea Kanaria Handiara joan da, playoffetako final-laurdenetako bigarren norgehiagoka jokatzera, ACBko jokalariek greba deialdiari oraindik eutsi arren.

Endesa Ligak jardunaldiko partiden programazio ofiziala mantentzen jarraitzen du, baina azken unera arte jokatuko diren ala ez zalantza izango da.

Jokatzen bada, Laboral Kutxa Baskoniak Herbalife Kanaria Handia kanporatzeko abagunea izango du. Buesa Arenan irabazi ondoren, finalerdietarako txartela eskuan dute Zan Tabaken gizonek.

Heurtelen hirukoari esker irabazi ondoren, (57-56), Baskoniak ‘Arrokan’ irabazteko gogorrago jokatu beharko du. Aurreneko neurketan, itxura kaskarra eman zuen Gasteizko taldeak, baina Thomas Heurtelen jokaldi ikusgarriari esker kanporaketan aurrea hartu du.

Zan Tabakek taldea motibatzeko arrazoiak bilatu behar izan ditu, jokalariek euren maila berreskuratzeko premia eta beharra baitute.