Baskonia
27. jardunaldia
Menorca-Caja Laboral: ACB Ligan jarri beharko dute burua
Erredakzioa
Sailkapeneko hirugarren postua berreskuratu nahi dute arabarrek Baleareetako taldearen aurka. San Emeteriok zalantza izaten jarraitzen du, orkatila minduta duelako.
Maccabiren aurkako lehen bi partidak jokatu ostean, Baskoniak ACB Ligan jarri beharko du burua Menorcaren aurka garaipena lortzeko. Israelera joan biano lehen, Ivanovicen mutilek aurrera pausua eman nahi dute sailkapenean, Power Electronics Valentzia hirugarren postutik kentzeko.
Ligako norgehiagokarako zalantza izango da San Emeterio, osteguneko partidan orkatila bihurritu zuelako. Kantabriarra ezinbesteko jokalaria da hasierako bostekoan eta badirudi Menorcaren aurka aulkian geldituko dela, indarrak Maccabiren aurka jokatzeko gorde nahi dituelako. Gainera, Nemanja Bjelicak ere ezin izango du jokatu ezker eskuan haustura duelako eta Pape Sow lesionatuarekin geldituko da Gasteizen.
