Real Madrilek Barça hiruko marratik astindu eta finala berdindu du

69 - Bartzelona Regal (21+19+16+13) : Huertas (10), Eidson (), Mickeal (10), Lorbek (22), Vázquez (11) -hasierako bostekoa- Navarro (11), Sada (-), CJ Wallace (1), Ingles (2), Ndong (-), Rabaseda (2).

75 - Real Madril (20+20+9+26): Llull (5), Suarez (3), Syngler (8), Velickovic (5), Tomic (12) -hasierako bostekoa - Pocius (2), Reyes (6), Rodriguez (14), Carroll (10), Mirotic (10), Begic (-),

Real Madrilek ACB Ligako finala orekatu du, hiruko marratik erakustaldia eman eta gero. 17 saiakeratik 11 hiruko saskiratu dituzte zuriek eta Palau Blaugrana konkistatu dute. Bartzelonari 69-75 irabazi dio Real Madrilek finaleko bigarren neurketan.

Sergio Rodriguezek hiru hiruko saskiratu ditu jarraian, eta Miroticek eta Carrollek beste bi sartu dituzte azken laurdenean. Xavi Pascualen taldea erantzunik gabe geratu da. Barçak aurreneko partidan baino hobeto jokatu du, baina kantxa faktorea galdu dute kataluniarrek.

Sergio Rodriguez antolatzaileak zurien jokoa zuzendu du eta blaugranen aldetik Erazem Lorbek nabarmendu da, baina sartutako 22 puntuak ez dira nahikoak izan.

Lehen neurketako azken hasperenean jasotako kolpea ez dute ordaidu Pablo Lasoren mutilek eta saskiratzeak erraz lortu dituzte. Hala ere, Bartzelonak ez du etsi eta erantzuna eman dio zurien jokoari.

Neurketa azken laurdenean erabaki da. Navarrok eta Lorbekek hiruko marratik asmatu dute eta bederatzi puntuko aldea eman diote Barçari (65-56, 34. minutua), baina Real Madrilek txanpon berdinarekin ordaindu dio.

Finalak orain Madrilera egingo du bidaia eta bi taldeek kanporaketako hirugarren partida astelehenean jokatuko dute.