Artea
Arte azoka
Chillida, Oteiza eta besteren lana, ostegunetik Donostiartean azokan
Erredakzioa
Arte topaketa ostegunean hasiko da, Kursaalen. 37 galeriak parte hartuko dute, tartean Euskal Herriko bederatzik.
-
Kursaal jauregiak hartuko du azoka. Argazkia: Mikel Gasca.
300 aristaren lana, tartean, esaterako, Eduardo Chillida eta Jorge Oteizarena, ikusi ahalko da Arte Garaikidearen Donostiako Nazioarteko I. Azokan. Ostegunean zabalduko dute, Kursaalen, eta aurrerago Europa mailan erreferente izatea da antolatzaileen helburua.
Juan Karlos Izagirre Donostiako alkateak, Ignacio Scarpellini zuzendari nagusiak eta Carlos Ruiz Kutxako Gizarte Ekintzako zuzendariak aurkeztu dute topagunea, gaur, prentsaurreko batean. 37 galeria izango dira guztira Donostiartean, eta horietako bederatzi izango dira euskal herritarrak.
Izen handien eta artista berrien lanak erakutsiko dituzte “sormenaren jai” honetan. Hasteko, Abel Azcona artista iruindarrak ‘performance’ bat gauzatuko du, inaugurazio egunean, arratsaldeko zazpi eta erdietan.
Inaugurazio ekitaldiaren ostean, hilaren 11ra arte egongo da zabalik Donostiartean, Kursaal jauregian. Guztira, 37 galeriak erakutsiko dituzte beren artelanak, besteak beste Pariseko batek eta Busango (Hego Korea) beste batek.
Orotara, 300 sortzaileren baino gehiagoren lanak erakutsiko dituzte Donostiartean topagunean: Manolo Valdés, José Luis Zumeta, Nestor Basterretxea, Marta Cárdenas, Miquel Barceló, Darío de Regoyos, Menchu Gal, Cristina Iglesias, Joan Miró, Joaquín Sorolla, Saura, Picasso, Antonio López, Tapies, Eduardo Arroyo…
