Itxi

Artea

Zuzendari aldaketa

Beatriz Herraez izango da Artium Museoko zuzendaria

eitb.eus

Arte historialari eta komisarioak Daniel Castillejoren lekukoa hartuko du Arte Garaikidearen Euskal Zentro-Museoaren buruan.

  • Beatriz Herráez, Artium zuzendaria

    Beatriz Herráez, Artium zuzendaria

Apirilean Daniel Castillejok Arte Garaikidearen Euskal Zentro-Museoaren zuzendaritza utziko zuela iragarri eta gero, Beatriz Herraezek hartuko du haren tokia, eta Castillejo Artium Bildumaren kontserbatzaile postura itzuliko da. Iragarpena egin zuenean, postua zapore "gazi-gozoz" utziko duela esan zuen Castillejok, krisiak ez baitio aukerarik eman berak nahi zituen proiektu guztiak gauzatzeko.

Aho batez hartu du balioespen batzordeak Herraez izendatzeko erabakia, hilabete batzuetako prozesu batean guztira hamabi proiektu aztertu ostean.

Herraez gasteiztarrak Artearen Historiako eta Arte Ederretako prestakuntza jaso zuen Euskal Herriko Unibertsitatean, eta bi alderdi banaezin nabarmentzen dira haren ibilbidean: bata, hitzaldi eta argitalpenekin lotua eta, bestea, arte garaikidearen komisario lanari eta batzorde espezializatuetan izan duen partaidetzari buruzkoa.

Komisario lanen aldetik, ibilbide luzea egin du. 2007tik izen handiko guneetan antolatutako erakusketa monografiko askoren komisarioa izan da, hala nola, Reina Sofian (Madril), Castillocorralesen (Paris), Sculpture Centeren (New York) eta Azkuna Zentroan eta Tabakaleran.

Herraezek Artium Bildumari buruz duen ikuspuntuari dagokionez, apustua egingo du "dibertsitatearen alde, museoaren xede den gizartearen aniztasuna, XX. mendeko 60ko urteetatik aurrerako euskal sormenari lehentasuna emango dion ikuspuntu kronologikoa eta nazioarteko dimentsio bat islatuz".