Bertsolaritza
Txapelketa Nagusia
Gaztelumendi Murgiako finalaurrekoan izango da Altsasun irabazi ostean
Erredakzioa
Azaroaren 17an jokatuko den finalaurrekoan kantatuko du añorgarrak, Aitor Mendiluze, Sustrai Colina eta sailkatzeko dauden beste hiru bertsolarirekin batera.
-
Silveira eta Gaztelumendi, orpoz orpo, Altsasun. Irudia: Gari Garaialde / Bertsozale Elkartea
Beñat Gaztelumendik irabazi du Altsasuko kanporaketa eta hurrengo faserako zuzeneko txartela eskuratu.
Honako puntuazioa lortu dute bertsolariek:
Beñat Gaztelumendi 695,5
Jexux Mari Irazu 666,5
Xabier Silveira 652,5
Unai Agirre 650,5
Erika Lagoma 622,5
Oihane Perea 602
Altsasun lortu duen lehen postuari esker, Beñat Gaztelumendi zuzenean sailkatu da finalaurrekoetarako. Azaroaren 17an Murgian jokatuko den finalaurrekoan kantatuko du añorgarrak, Aitor Mendiluze, Sustrai Colina eta oraindik erabakitzeke dauden beste hiru bertsolarirekin.
Asteazkenetik sarrera guztiak salduta zirela, 825 bertsozalek lepo bete dute Burunda pilotalekua. Antolatzaileek bereziki eskertu nahi izan dute Altsasuko udalak, Sakanako mankomunitateak eta Sakanako bertso eskolak saioa antolatzeko emandako laguntza.
Legazpin jokatuko da Bertsolari Txapelketa Nagusiko bosgarren kanporaketa. Saioa hurrengo larunbatean, hilaren 19an, izango da, 17:30ean, Urbeltz pilotalekuan. Sei bertsolari arituko dira: Ainhoa Agirreazaldegi, Beñat Lizaso, Igor Elortza, Inigo Mantzizidor "Mantxi", Jokin Uranga eta Oihana Bartra.
Legazpiko kanporaketako sarrerak dagoeneko salgai daude bertsosarrerak.eu webgunean.
