Itxi

2021/10/14

11:04

Literatura

Sariak

Euskadi sariak, Pello Lizarralde, Anjel Lertxundi eta Joxan Elosegirentzat

N. V. | EITB Media

Euskarazko Literatura, Euskarazko Haur eta Gazte Literatura eta Euskarazko Literatura Itzulpena modalitateetan "Argiantza", "Haltzaren muinoa" eta "Nik kantatu eta dantza egiten du mendiak" saritu dituzte.

  • Pello Lizarralde, Anjel Lertxundi eta Joxan Elosegi

    Pello Lizarralde, Anjel Lertxundi eta Joxan Elosegi

  • Whatsapp
  • Whatsapp
  • Bidali

Euskadi Literatura sarietako 2021eko lehenengo hiru irabazleak iragarri ditu gaur Bingen Zupiria Eusko Jaurlaritzako Kultura eta Hizkuntza Politikako sailburuak, Donostiako San Telmo Museoan egindako ekitaldian.

Euskarazko Literatura sailean, "Argiantza" Pello Lizarralderen eleberria da irabazlea; Euskarazko Haur eta Gazte Literaturan, "Haltzaren muinoa" Anjel Lertxundiren lana, eta Euskarazko Literatura Itzulpena modalitateko irabazlea Joxan Elosegi izan da, "Nik kantatu eta dantza egiten du mendiak" Irene Solà kataluniarraren eleberria euskara ekartzeagatik.

Epaimahaiaren iritziz, Pello Lizarralderen "Argiantza" liburuko pertsonaien inguruan eraikitzen duen "atmosfera harrigarriak" erabat harrapatzen du irakurlea. Gainera, "ahots narratiboari dagozkionak trebeki erabiliz, indar liriko handiko deskribapenak baliatuz, maisutasunez eraikitako kontakizuna" eskaintzen du Lizarraldek.

"Galtzen ari den mundu batean galtzen ari den pertsona baten bidaia" da liburu hunkigarria, idazleak berak gaurko ekitaldian esan duenez.

Anjel Lertxundiren "Haltzaren Muinoa" lana "kalitate literario" handiko obra dela uste du epaimahaiak: "Esaldi eta kapitulu laburrez osaturik dago, eta aberatsa da tradizioari eta gazte literaturako klasikoei eginiko erreferentziak direla medio; aberatsa, halaber, kontatzeko modu arin, poetiko eta zainduagatik", dio ebazpenak.

Joxan Elosegiren itzulpenaz epaimahaiko kideek "estiloaren joritasuna" nabarmendu dute, "jatorrizkoaren jario orobat bixi eta magikoa euskarara isurtzen asmatu duelako". Irene Solaren "estiloak eta testuaren tonuak jarritako erronkei erantzuterakoan itzultzaileak erakutsitako irudimena eta sormenerako gaitasuna" azpimarratu dituzte.

Saridun bakoitzak 18.000 euroko saria izango du, eta 4.000 euro gehiago eskura ditzake bere lana beste hizkuntza batean argitaratzen bada. Euskarazko Literatura Itzulpenaren irabazleak 18.000 euro jasoko ditu.

Azaroaren 18an banatuko dituzte sariak, Artium museoan, Gasteizen. Literatura Gaztelaniaz, Lan Literarioen Ilustrazioa, Saiakera Euskaraz eta Saiakera Gaztelaniaz arloetako irabazleak gaur zortzi iragarriko dituzte.

  • Bisitatuena

      Kargatzen ikusiena
      Kargatzen ikusiena
    ;