Zinema
Sariak
'The Artist' frantziarra, garaile Oscar sarietan
Bost sari jaso ditu, tartean film onenarena, gizonezko aktore onenarena, zuzendari onenarena eta soinu banda onenarena. 'Hugo' pelikulak beste bost eskuratu ditu, baina sail teknikoetan.
Albisteak (2)
Bideoak (1)
Informazio gehiago (1)
'The Artist' pelikula mutu frantziarrak bost Oscar sari eskuratu ditu Los Angelesen egin den galan, tartean, film onenarena, gizonezko aktore onenarena (Jean Dujardinentzat), zuzendari onenarena eta soinu banda onenarena (Ludovic Bourcentzat). "Billy Wilderri eskerrak eman nahi dizkiot", adierazi du hirutan Michel Hazanavicius pelikularen zuzendariak. Aurretik, Uggie zintako txakur protagonistari eskerrak eman dizkio zuzendari onenaren saria jasotakoan.
Anglosaxoia ez den pelikula batek film onenaren saria lortu duen lehen aldia izan da eta pelikula mutu batek sari garrantzitsuena lortzen duen bigarrena.
"Hugo" pelikulak, bere aldetik, beste bost Oscar sari jaso ditu, baina sail teknikoetan: ikusizko efektu onenarena, zuzendaritza artistiko onenarena, argazkilaritza onenarena, soinu editatze onenarena eta soinu efektu onenarena.
Alberto Iglesias euskal konpositoreak ez du soinu banda onenaren saria eskuratu. Gaueko irabazleak, "The Artist" lanak, eskuratu du sari hori ere. Bestalde, "Rango" filmak animaziozko pelikula onenaren saria eskuratu du, Fernando Truebaren eta Javier Mariscalen "Chico & Rita" kanpoan utzita. Woody Allenen "Midnight in Paris" lanak, bere aldetik, jatorrizko gidoi onenaren saria eskuratu du (Jaume Roures espainiarrak ekoitzi du).
Meryl Streep aktore estatubatuarrak Viola Davis ("Neskameak eta andreak") gailendu du eta emakumezko aktore onenaren saria eskuratu du "Burdinazko dama" pelikulan egindako lanagatik. "Kramer vs. Kramer" eta "Sophieren erabakia" pelikulekin saria lortu ostean, hirugarren estatuatxoa da. Ingrid Bergmanek, Jack Nicholsonek eta Walter Brennanek soilik eskuratu dute marka hori eta Katherine Hepburnek bat gehiago eskuratu zuen. "Burdinazko dama" pelikula bi sari jasotzeko hautagai izendatu zuten eta biak lortu ditu: emakumezko aktore onena eta makillajerik onenarena.
Iragarpen guztiak bete egin dira antzeztaldeko aktore onenen sailean: Christopher Plummer ("Beginners") estatuatxo bat irabazi duen aktore zaharrena -82 urte- da eta Octavia Spencerrek "Neskameak eta andreak" lanagatik jaso du saria.
Billy Crystal komikoak gidatu duen ekitaldian saria lortu duten beste pelikula batzuk: ingelesez ez den film onenaren saria Asghar Farhadiren "Nader eta Simin, banaketa baten istorioa" lanak eskuratu du, gidoi egokiturik onenaren saria "Ondorengoak" filmarentzat izan da eta dokumental laburrik onenaren saria "Saving Face" lanarentzat. Abesti onenaren saria, berriz, "Man or Muppet" pelikulak lortu du.
