Publizitatea
Itxi

2013/09/18

11:30

Zinemaldia

61. ZINEMALDIA

Nork eskuratuko du Zinemaldiko Urrezko Maskorra?

Erredakzioa

13 film arituko dira sari nagusia eskuratzeko lehian. Hainbat zuzendarik lan berriak aurkeztuko dituzte: Atom Egoyan, David Trueba, Roger Michell eta Denis Villeneuve zuzendariek, besteak beste.

  • Donostiako Zinemaldiko kartela

    Donostiako Zinemaldiko kartela

  • Whatsapp
  • Whatsapp
  • Telegram
  • Bidali

13 lan arituko dira lehian Donostiako Zinemaldiaren 61. edizioaren Sail Ofizialean. Gainera, hiru pelikula lehiaketatik kanpo izango dira: "Zugarramurdiko sorginak", Alex de la Iglesiarena, "Futbolina", Juan José Campanellarena (jaialdiaren irekiera ekitaldian proiektatuko dute) eta "The Young and Prodigious T.S. Spivet ", Jean-Pierre Jeunetena (itxiera ekitaldian izango da ikusgai).

Horrela, hauek dira Donostiako Zinemaldiaren sari gorena, Urrezko Maskorra, eskuratzeko lehian izango diren pelikulak: "Kanibala", "Sandwich kluba", "Deabruaren korapiloa", "Etsaia", "Hitz egin ezin duten horientzat", "Zauria", "Arima sendatzen didazu", "Urri-azaroak", "Ile txarra", "Quai d'Orsay", "Burdinbideko gizona",  "Bizitzea erraza da, begiak itxiz gero" eta "Le Week-end".

Pelikula aipagarrienak hauek dira:  "Kanibala", Antonio de la Torre protagonista duelarik, "Debruaren korapiloa", Atom Egoyanen zuzendaritzapean eta Reese Whiterspoon eta Colin Firth protagonista dituelarik, "Quai d'Orsay", Frantziako Atzerri ministroari buruzko satira politikoa eta "Burdinbideko gizona", Colin Firthekin eta Nicole Kidmanekin, besteak beste.

2013ko Zinemaldiko Sail Ofizialean ikusgai izango diren pelikulak:

Kanibala

Espainia-Errumania-Errusia-Frantzia

Zuzendaria: Manuel Martín Cuenca

Gidoia: Alejandro Hernández, Manuel Martín Cuenca

Argazkia: Pau Esteve Birba

Antzezleak: Antonio de la Torre, Olimpia Melinte

Carlos Granadako jostun prestigiotsuena da, baina baita itzalpeko hiltzailea ere. Ez du ez kontzientziako harrik ez kulparik... Nina ezagutzen duen arte. Ninari esker, bere egintzak benetan nolakoak diren ezagutuko du, eta lehenengo aldiz maiteminduko da.

 

Sandwich kluba

Mexiko

Zuzendaria: Fernando Eimbcke

Gidoia: Fernando Eimbcke

Argazkia: María Secco

Antzezleak: María Renée Prudencio, Lucio Giménez Cacho, Danae Reynaud

Fernando Eimbcke mexikarrak hirugarren filma estreinatuko du Donostian. Palomak eta bere hamabost urteko seme Héctorrek oso harreman handia eta berezia dute. Kostaldean oporretan daudela, Hectorrek Jazmín nerabea ezagutuko du, eta maitasunaren eta sexuaren lehen izpiak biziko ditu.

 

Debruaren korapiloa

AEB

Zuzendaria: Atom Egoyan

Gidoia: Scott Derrickson, Paul Harris Boardman

Argazkia: Paul Sarossy

Antzezleak: Reese Whiterspoon, Colin Firth

Atom Egoyanek misterio-film artegagarri bat zuzendu du, herri txiki batean eraildako hiru haurri buruzko egiazko kasu batean oinarrituta.

 

Etsaia

Espainia-Kanada

Zuzendaria: Denis Villeneuve

Gidoia: Javier Gullón

Argazkia: Nicolas Bolduc

Antzezleak: Jake Gyllenhaal, Mélanie Laurent, Sarah Gadon, Isabella Rossellini

Krisian dagoen gizon baten psikea aztertzen duen thriller misteriotsua. Adam irakasleak bizitza monotonoa darama, baina, halako batean, Anthony ezagutuko du; hots, fisikoki bera bezalakoa den garrantzi eskaseko aktorea.

 

Hitz egin ezin duten horientzat

Bosnia-Herzegovina

Zuzendaria: Jasmila Žbanic

Gidoia: Kym Vercoe, Jasmila Žbanic, Zoran Solomun

Argazkia: Christine A. Maier

Antzezleak: Kym Vercoe, Boris Isakovic, Jasna Djuricic, Leon Lucev, Simon McBurney

Jasmila Zbanic (Grbavica) zinemagile bosniarra Balkanetako gerraren iragan traumatikora itzuliko da Kym protagonistaren bitartez. Kym turista australiarrak historiaz beteriko Visegrado Bosniako herrira bidaiatuko du, eta bazter guztietatik bertan gertatutako izugarrikerien arrastoak geratzen direla ikusiko du.

 

Zauria

Espainia

Zuzendaria: Fernando Franco

Gidoia: Fernando Franco, Enric Rufas

Argazkia: Santiago Racaj

Antzezleak: Marian Álvarez, Manolo Solo, Rosana Pastor, Andrés Gertrudix, Ramón Agirre

Anak 30 urte ditu eta anbulantzia-gidaria da. Mugako nortasun-nahasmendua du, baina berak ez daki. Hori dela-eta, bere kalterako gauzak egiten ditu, esaterako, alkohol gehiegi edan eta bere burua jo. Ez du bere irrikarik handiena lortzen: zoriontsu izatea.

 

Arima sendatzen didazu

Frantzia

Zuzendaria: François Dupeyron

Gidoia: François Dupeyron

Argazkia: Yves Angelo

Antzezleak: Grégory Gadebois, Céline Sallette, Jean-Pierre Darroussin, Marie Payen, Philippe Rebbot

Frédi ama zenak sendatzeko boterea transmititu diola ohartuko da. Hasieran, erabat errefusatuko du, zoritxarrekoa baita; baina, istripu batek dena aldatuko du. Ezinbestean onartu beharko du bere eskuek sendatzeko gaitasuna daukatela.

 

Urri-azaroak

Austria

Zuzendaria: Götz Spielmann

Gidoia: Götz Spielmann

Argazkia: Martin Gschlacht

Antzezleak: Nora von Waldstätten, Ursula Strauss, Peter Simonischek, Sebastian Koch, Johannes Zeiler

Austriako Alpeetako herri txiki batean itxitako hotel bat dago. Bi ahizpa hazi ziren bertan. Sonja Berlinen bizi da orain. Haren ahizpa, Verena, helduxeagoa bera, ez zen inoiz herritik joan. Sonjarentzat iritsi da familia eta haurtzaroko lekuak bisitatzeko garaia. Bilerak azalera aterako ditu pixkanaka, baina errukigabe, bi ahizpen arteko antzinako gatazkak.

 

Ile txarra

Venezuela-Peru-Alemania

Zuzendaria: Mariana Rondón

Gidoia: Mariana Rondón

Argazkia: Micaela Cajahuaringa

Antzezleak: Samuel Lange, Samantha Castillo

Mariana Rondón zinemagile eta artista plastikoaren hirugarren filmaren protagonista Junior da, «ile aldrebesa» duen 9 urteko mutikoa. Eskolako argazkia ateratzeko, ilea lisatu nahi du, eta modu honetan modan dagoen kantari baten itxura izan. Egoera honek, baina, amarekin liskarra sortuko dio. Bitartean Juniorrek bere burua eder ikusi nahi du amak maita dezan, amak geroago eta gehiago arbuiatuko du. Azkenean oso mingarria den erabakia hartzera behartua aurkituko da.

 

Quai d'Orsay

Frantzia

Zuzendaria: Bertrand Tavernier

Gidoia: Antonin Baudry, Christophe Blain, Bertrand Tavernier

Antzezleak: Thierry Lhermitte, Raphaël Personnaz, Niels Arestrup, Bruno Raffaelli

Bertrand Tavernierrek Lanzac & Blain komikigileen izen bereko obra egokitu du film berrian. Satira politikoa da, eta Alexandre Taillard de Vorms Frantziako Atzerri ministroa du protagonista.

 

Burdinbideko gizona

Erresuma Batua-Australia

Zuzendaria: Jonathan Teplitzky

Gidoia: Frank Cottrell Boyce, Andy Paterson, Eric Lomaxen memorietan oinarrituta.

Argazkia: Garry Phillips

Antzezleak: Colin Firth, Nicole Kidman, Stellan Skarsgard, Jeremy Irvine, Hiroyuki Sanada

Txikitatik trenekin liluratuta dagoen Eric Lomax ofizial britainiarraren egiazko historia da. Bigarren Mundu Gerran japoniarrek harrapatu zuten eta lan-esparru batera bidali zuten. Han, berak eta bere kideek baldintza oso gogorretan bizi behar izan zuten, eta beren atzemaileen torturak jasan.

 

Bizitzea erraza da, begiak itxiz gero

Espainia

Zuzendaria: David Trueba

Gidoia: David Trueba

Argazkia: Daniel Vilar

Antzezleak: Javier Cámara, Natalia de Molina, Francesc Colomer

1966an, Espainian, ingelesa irakasteko Beatlesen abestiak erabiltzen dituen irakasle bat John Lennon Almerian film bat grabatzen ari dela ohartuko da. John Lennon ezagutu nahian, Almeria aldera joango da, eta, bidean, etxetik ihes egin duen 16 urteko mutiko bat eta itxuraz zerbaitetatik ihesi dabilen 21 urteko neska gazte bat hartuko ditu. Adiskidetasun ahaztezina sortuko da hiruren artean.

 

Le Week-end

Erresuma Batua

Zuzendaria: Roger Michell

Gidoia: Hanif Kureishi

Argazkia: Nathalie Durand

Antzezleak: Jim Broadbent, Lindsay Duncan, Jeff Goldblum

Roger Michellen (Notting Hill, Eduring Love) film berriak Nick eta Meg ditu protagonista. Britainia Handiko bi irakasle Parisera bueltatuko dira, eztei-bidaia egin eta handik urte askora, beren arteko harremana biziberritzeko.

  • Hau zure interesekoa bada, baliteke beste gai hauek ere izatea:
  • Bisitatuena

      Kargatzen ikusiena
      Kargatzen ikusiena