Itxi

Zinemaldia

Zinemaldia

2021/09/19

14:05

Zinemaldia

69. edizioa

Zinemarekiko grina agerikoa da Donostiako kaleetan, Zinemaldia dela eta

EITB Media

Besteak beste, "Zeruan legez", "Arthur Rambo", "Crai nou" eta "Camila sale esta noche" pelikulak izango dira ikusgai igande honetan.

  • Hainbat pertsona Donostian, Zinemaldiaren harira jarritako kartel baten aurrean. Argazkia: EFE

    Hainbat pertsona Donostian, Zinemaldiaren harira jarritako kartel baten aurrean. Argazkia: EFE

  • Whatsapp
  • Whatsapp
  • Telegram
  • Bidali

Donostiako Nazioarteko Zinemaldiaren 69. edizioak bide onetik jarraitzen du aurrera, besteak beste Sail Ofizialean parte hartzen duten pelikulen proiekzioarekin, hainbeste desiratutako Urrezko Maskorra irabazteko lehian. Halaber, beste sailetan parte hartzen duten ikus-entzunezko lanak ikusteko aukera dago egun hauetan.

Testuinguru horretan, zinemarekiko grina agerikoa da igande honetan Gipuzkoako hiriburuko kale nagusietan, eta hala izango da hilaren 25era arte.

Besteak beste, "Zeruan legez", "Arthur Rambo", "Crai nou" eta "Camila sale esta noche" pelikulak izango dira ikusgai igande honetan.

"Zeruan legez" (86 min.) daniar filmaren kasuan, Tea Lindeburgek zuzendua, Flora Ofelia Hofmann Lindahl, Ida Cæcilie Rasmussen eta Palma Lindeburg Leth ditu protagonista. Film luze honek Liseren istorioa kontatzen du, 14 urteko neskato bat. Hain zuzen ere, XIX. mendearen amaieran kokatzen da, eta, egun batetik bestera, haren bizitza betiko aldatzen da. Bere familian eskolara joaten lehena da, eta itxaropenez eta konfiantzaz beterik dago. Alabaina, badirudi zerbait gaizki doala, eta, beraz, eguna ez da berak espero bezala amaitzen.

Igande honetan Zinemaldian ikusi ahal izango den beste film aipagarri bat "Arthur Rambo" (87 min.) da, Laurent Cantetek zuzendua eta Rabah Nait Oufella, Antoine Reinartz eta Sofian Khammes protagonista dituena. Sail Ofizialean lehiatzen den film honek Arthur Ramboren istorioa kontatzen du, sare sozialetan gorrotoz beterik idatzitako mezuen egilea.

Testuinguru horretan, Alina Grigore zuzendariaren "Crai nou" (85 min.) izango da eguneko beste protagonistetako bat. Ioana Chitu, Mircea Postelnicu, Mircea Silaghi eta Vlad Ivanov aktoreak dira protagonista nagusiak.

Ines Barrionuevo argentinarra, Donostian bere azken lana aurkeztuko duen beste zinemagiletako bat da. Hala, "Camila sale esta noche" (103 min.) filmarekin Zinemaldiko sari nagusia lortzen saiatuko da. Nina Dziembrowski, Maite Valero, Diego Sanchez eta Adriana Ferrer dira film luze honetako protagonistak. Camilak bizi duen bat-bateko aldaketa kontatzen du filmak, haren amona larriki gaixotzen denean.

Bestalde, Raphael abeslaria "Raphaelismo" telesailaren aurkezpenean izango da. Ikus-entzunezko proiektu hau, artistaren "arrakasta, sekretu, beldur eta ametsetan" oinarrituta dago.

Hala, Raphael bera, bere familia, RLM eta Universal Music Spain protagonista dituen baimendutako lehen dokumentala da. Gainera, orain arte argitaratu gabeko irudiak jasotzen ditu. Zinemaldiko Movistar+ galan, beraz, "Raphaelismo" telesailaren lehen atala ikusteko aukera egongo da.

Zehazki, lau ataletan dago banatuta dokumentala, eta, Raphael abeslariaz gain, Natalia Figueroa emaztea eta Jacobo, Alejandra eta Manuel Martos seme-alabek parte hartu dute proiektu honetan. Hala, telesail honekin, artistaren ikuspegi intimoagoa eta gizatiarragoa erakutsi nahi dute.

Ildo horretatik, Charlie Arnaizek eta Alberto Ortegak (Dada Films & Entertainment) sortu eta zuzendutako proiektua da. Telesail-dokumental hau Madril, Bartzelona, Malaga, Linares (Jaen), Tamajon eta El Cubillo de Uceda (Guadalajara), Benidorm (Alacant), Mexiko, Miami eta Los Angeles artean filmatu dute, eta 2022an iritsiko da Movistar+ ordainpeko plataformara.

  • Bisitatuena

      Kargatzen ikusiena
      Kargatzen ikusiena
    ;