telebista
Zuzenean
Astigarragatik Txotx denboraldiaren irekiera, ETB-1en eta eitb.com-en
A.E.
EITB
Saio berezia izango da 13:00etan. Horrez gain, gauean 'Harian'ek ere aurtengo sagardotegi garaiaren denboraldiaz erreportaje berezia eskainiko du.
Asteazkenean, urtarrilaren 16an, Sagardoaren Lurraldeak antolatutako Txotx denboraldiaren irekiera zuzenean emango dute ETB-1ek eta eitb.com-ek. Horrez gain, gauean 'Harian' tarteak aurtengo sagardotegi garaia zabaldu dela eta erreportaje berezia eskainiko du.
Astigarragan zuzenean egongo da ETB-1 13:00etatik aurrera. Astigarragako Petritegi sagardotegian izango da Sagardo Berriaren Eguneko Txotx-aren ekitaldia eta saioko lan-taldeak handik emango du berri. Aurten, La Oreja de Van Gogh taldeko kideek egingo dute lehen txotx hori Astigarragan. Donostiako musikariek Julian Iantziren lekukoa hartuko dute. ETBko aurkezleak ireki zuen iaz txotx-a. Musika taldeko kideek 'Gure sagardo berria' oihu egiten dutenean, lehen kupela irekiko dute eta horrekin batera sagardo denboraldi berria hasiko da.
Andoni Mutiloa kazetariak egingo du jazotzen den guztiaren kontakizuna, eta bertan, ekitaldira gonbidatutako guztiei elkarrizketak egiten, Kristina Urrutia eta Joseba Olagarai kazetariak egongo dira. Sagardogile eta euskal erakunde eta kultur arloko ordezkari ugari bilduko dira. Zuzeneko emanaldian, gainera, bideoak ere tartekatuko dira: urte hauetan Txotx-a zabaltzen egon diren pertsonaien errepasoa egingo dute, besteak beste.
'Harian', gauean
Txotx-aren inguruko saio honetaz gainera, 'Harian' erreportajea izango da gauean 22:15ean, Oihane Mateosek aurkeztuta. Joan zen igandean sagardoaren lehenengo Txotx-a ireki zuten Hernanin, eta bertan gertatutakoa kontatuko dute. Jai-giroa lagun, Joseina Etxeberria, Ainhoa Vitoria, Jon Gotzon eta Edurne Garmendia Gazteako 'Dida' irratsaioko kideak izan ziren aurtengo gonbidatuak.
Dena den 'Harian' ere eguerdi parteko Astigarragako 2013ko Sagardo Berriaren Eguneko Txotx-ean ere izango da, eta bertan jasotako iritzi eta kontu guztiak ekarriko ditu.
