Villabuena, gaur, "Historias a Bocados" saioan

Villabuena udalerria bisitatuko du gaur Joseba Arguiñanok EITB Mediako "Historias a Bocados" saioan. Arabako Errioxako kuadrillaren baitan dago, eta 350 bat biztanle eta 40 bat upategi ditu, upategi bat zortzi biztanleko. Luis, Begoña, Araceli, Francisco eta Javier bertako bizilagunekin elkartuko da Joseba, eta tokiko ardogintza- eta gastronomia-tradizioa izango dituzte hizpide.

Bodegas Luis Cañas da han dagoen upategietako bat, ardogintzan hainbat belaunaldi egin dituen familiaren negozioa. Juan Luis Cañasek egingo dio harrera Josebari, ehun urte inguru dituzten mahastietan. Mugrón izeneko aihena erakutsiko dio, mahatsondotik moztu gabe ehorzten dena, sustraitu eta landare berria egin dezan. Ondoren, upeltegiaren kanpoaldean, txitxarroa egingo dute parrilla mugikor batean, eta elkarrekin dastatuko dute Juan Luisek Josebari bere familiaren eta upeltegiaren istorioak kontatzen dizkion bitartean. Besteak beste, aitonaren kontuak ezagutuko ditugu, ardoa mandoetan Bilboko Alondegian saltzeko eramaten zituenekoak.

Begoña García eta Araceli Aldama lagun minak dira, duela ia 50 urtetik. Herria leku paregabe batetik erakutsiko diote Josebari, tokiaz harro daudela agerian utzita. Ondoren, García Berrueco Upeltegiaren txokora joango dira, bertan zartaginkada egiteko. Arkume gisatua prestatuko dute, baratzeko beste osagai askorekin. Plater oso ezaguna da inguru horretan, eta urtetan taldean dastatu izan da, udan zein mahats-bilketa garaian. Azkenik, herriko istorioak partekatuko dituzte, eta historikoki emakumeek landa-lanetan izandako funtsezko paperaz hitz egingo diote Josebari.

Francisco Martínez de Cañas, berriz, Villabuena de Álava/Eskuernaga: datos para su historia nunca contada liburuaren egilea da. Hala, ez dago bera baino bizilagun hoberik bertako historia gertutik ezagutzeko. Ardoarekin zerikusia duen guztiaz gain, udalerrian badute erdigune historiko bat, hainbat jauregirekin eta eliza ikusgarri batekin. Tokiak zuen botere ekonomikoaren eta distira historikoaren berri ematen duten elementuak dira. Ondoren, Javier Besa upeltegian arroza eta untxia dastatuko dituzte elkarrekin; eta, azkenik, Franciscok hainbat altxor erakutsiko dizkio Josebari, besteak beste, nekazaritzako lanabesak eta ardoa egiteko garai batean erabiltzen ziren tresnak.

"Historias a Bocados" saioa gaur izango dugu ikusgai, 20:00etatik aurrera, ETB2n eta eitb.eus-en.