Prestaketa

1. Azetato plastikoarekin, molde karratuaren oinarria forratu.

2. Txokolatezko ispilu-saltsa egin:

· Gelatina xaflak ur hotzetan beratzen jarri.

· Ontzi sakon batean, gainontzeko osagai guztiak berotzen jarri, eta 10 minutuz emeki-emeki  irakin.

· Gelatina xaflak iragazi, eta ontzira gehitu. Ongi disolbatzen diren arte nahasi.

· Txokolatea ontzi batera iragazi, eta apur bat epeltzen utzi.

· Molde karratuaren oinarrian, txokolate-saltsarekin  geruza fin bat egin, eta hozkailuan gorde.

· Gainontzeko txokolate-saltsa gehiegi ez hozteko, maria bainuan, epel mantendu (30-35 Cº bitartean egon behar du txokolate saltsak).

3. Ganatxea egin:

· Txokolatea txikitu (labanaz), eta ontzi batean jarri.

· Esne-gaina ia irakiten den arte berotu, eta txokolateari gehitu. Ongi nahasi.

· Gurina gehitu, eta guztia ongi integratzen den arte nahasi.

· Plastiko filma "azala-azalarekin" moduan jarri, eta hozkailuan, 2 orduz pausatzen utzi.

· Pausatu ostean, gozogintzako mahukan sartu, eta hozkailuan gorde.

4. Almibarra egin:

· Ontzi batean, ura, pattarra eta azukrea 5 minutuz irakin. Segidan, kafe hautsa gehitu, ontzia sutatik baztertu, eta gorde.

5. Gioconda bizkotxoa egin:

· Labea, 180 Cº-an, goitik eta behetik berotzen jarri.

· Ontzi sakon batean, zuringoak, hagaxka elektrikoaren laguntzaz, harrotzen hasi.

Erdi harrotu direnean, azukre hautsa pixkanaka gehituz, elur punturaino harrotu.

· Beste ontzi sakon batean, arrautzak azukrearekin harrotu (hagaxka elektrikoarekin).

Segidan, arbendol hautsa, gurin urtua, gatz apurra, arto almidoia eta bahetutako irina gehitu, eta mugimendu inguratzaileen laguntzaz, guztia ongi integratu.

· Merengea apurka-apurka oreari gehitu, eta, mugimendu inguratzailez, bi  osagaiak nahasi.

· Labeko erretilua paper sulfurizatuarekin forratu, eta hori, gainaldetik,  gurinarekin igurtzi (pausu hau garrantzitsua da).

· Orearen erdiarekin, erretilua bete, ongi zabaldu, pare bat kolpetxo eman orea ongi oinarritzeko, eta 15 minutuz laberatu.

Egiten denean, labetik atera, eta gelditzen den orearekin, prozesu bera jarraitu.

· Bizkotxoak hozten direnean, moldearen neurrira moztu. Hiru bizkotxo xafla behar ditugu.

6. Gurin krema egin:

· Maria bainuan, zuringoak eta azukrea berotu, azukrea disolbatzen den arte. Prozesu honetan, hagaxkaren laguntzaz, nahaskiari etengabe eragin.

· Segidan, nahaskia ontzi sakon batera atera, eta hagaxka elektrikoaren laguntzaz, elur punturaino harrotu.

· Banilla esentzia gehitu, gurin apur bat erantsi, eta harrotzen jarraitu.

· Gurin osoa apurka-apurka gehitu harrotzeari utzi gabe.

· Gurin osoa gehitutakoan, moztera doalako itxura hartuko du nahaskiak, baina ez beldurtu; gehiago eragin, eta, bat-batean, pomada itxurako sendotasuna hartuko du.

· Gozogile mahukan sartu.

7. Tarta muntatu:

· Hozkailutik, txokolatearekin igurtzi dugun paper sulfurizatua atera, eta, gainean, moldea jarri.

· Txokolatezko oinarriaren gainean, gurin krema geruza bat jarri, eta ongi zabaldu.

· Segidan, bizkotxoa jarri, eta almibarrarekin mozkortu.

· Jarraian, ganatxea zabaldu.

· Ondoren, bizkotxoa jarri, eta almibarrarekin mozkortu.

· Jarraian, gurin kremarekin prozesu bera jarraitu, eta bizkotxoarekin, berdin.

· Bukatzeko, txokolate saltsarekin geruza fin-fina egin, eta izozkailuan gorde ordu erdiz.

· Pausatu ostean, tarta izozkailutik atera, eta, buelta emanez, erretilu batera atera.

· Laban luze bat ur berotan epeldu, trapu batekin lehortu, eta tartaren lau aldeak ebaki,  itxura hobetzeko.

· Nahi bada, zatitan moztu, eta horiek nahieran apaindu.

OHARRAK:

· Tartak 8 geruza behar ditu; originala hala omen da. (Txokolatea + bizkotxoa + gurin krema + bizkotxoa + ganatxea + bizkotxoa + gurin krema + txokolate saltsa)

· Txokolate saltsa egun batetik bestera egin daiteke, eta hozkailuan gorde. Sobratzen bazaigu, berdin: hozkailuan gorde.

Saltsa berriro erabiltzeko trikimailua berotzea da, baina emaitza onak lortzeko, hau da, tartak, mousseak edo gainontzekoak glasatzeko, saltsak 30-35 Cº bitartean egon behar du.

· Gurin krema erraza inongo termometro edo antzeko gailuren beharrik gabe egingo dugu. Originala gorringoekin egiten da; azukrea 110 Cº-an berotu behar da karamelu bihurtu arte, eta hori hari fin eran gehitzen zaio gorringo harrotuari, merenge bat egiten ari bagina bezala.