Eguzkia nagusitzen joango da orduek aurrera egin ahala

Gaur ostarte zabalak gailenduko dira, Euskalmeten arabera. Egunsentia hotza izango da eta Araba eta Nafarroako zenbait tokitan izotza egingo du. Ipar partean eta batez ere kostaldean, goizean oraindik zaparrada batzuk botako ditu.

Elur-maila 600-800 m inguruan ibiliko da eta goizak aurrera egin ahala 1000 m-tik gora igoko da. Eguerditik edo arratsaldeko lehen orduetatik aurrera zeruan hodei gutxi egongo da. Mendebal-osagaiko haize ahula ibiliko da, arratsaldean hegoaldera egingo du eta egunaren bukaeran zakartu egingo da. Tenperatura maximoak 8-12 ºC artean egongo dira.

4,5 metrotarainoko olatuek abisu horia mantenduko dute 18:00ak arte.

Astelehena

Hodeiak, ostarteak eta hegoaldeko haizea. Hodeiak arratsaldetik aurrera ugariagoak izango dira, goizean urdinguneak nagusituko dira. Egunaren amaieran han-hemenka euri apur bat egin dezake barnealdean.

Hego-mendebaldeko haizeak tarteka zakar joko du haizeguneetan. Goizaldean Araban eta Nafarroako txokoetan izotza egin dezake berriro. Tenperatura maximoak berriz, igo egingo dira eta 10-15 ºC artean mugituko dira.