Amaitu da galerna arriskua dela eta ezarritako abisu horia

Larrialdi eta Meteorologiako zuzendaritzak abisu horia ezarri du gaur, larunbata, euskal kostaldean, 15:00etatik 20:00etara, galerna izateko arriskua dela eta, baina 17:00ak aldera amaitutzat jo dute.

Igandean, bestalde, zerua hodeitsu egongo da, tarteka oso hodeitsu, eta euri txikia  egingo du, bereziki Kantauri isurialdean.

Halere, iluntzean atertu egingo du, eta hodeiak gutxitu egingo dira. Gainera, tenperaturak behera egingo du: minimoak gutxi, eta maximoak asko.

Astelehenean, ateri

Astea eguraldi gozoarekin hasiko da, astelehen goizean lanbroa eta lainoa sortuko badira ere, zerua hodei gutxirekin edo oskarbi egongo da.

Haizea ahul eta aldakor ibiliko da; eguerdian ipar-ekialdetik joko du, bizi antzean, eta tenperaturan, minimoek behera egingo dute, eta maximoek gora.