Jon Silveira lesakarrak irabazi du 'Erronka'ko itsas bidaia

Jon Silveira izeneko erabiltzailea Meditarraneoan barrena ibiliko da astebetez itsas bidaian, eitb.com-en eta Eroski Bidaiak-en eskutik. Hilaren 26an, ostiralean, urrian zehar Eguraldiko ‘Erronka’n parte hartutakoen artean zozketa egin genuen, eta 494 izenenen artean Lesakako erabiltzailearena atera zen.

Lagun baten argazkiaren alde egin bozkatu zuen Silveirak, eta hara non, sari potoloa irabazi du: "Isidro Etxeberria laguna dut eta bere udazkeneko argazkiari eman nion botoa. Azkenean ez zuen irabazi baina... nik bai!", esan zigun bidaia irabazi zuela jakin zuenean. Hasieran, ezin sinistuta hartu zuen berria, eta gero, pozik: "Ez zait inoiz ezer tokatu eta... begira!", erantsi zuen hunkituta.

Eroski Bidaiak-en eskutik, itsas bidaian izango dira Silveira eta hark aukeratutako laguna. Azaroaren 16an irtengo dira Valentziatik, eta zazpi egunez Mediterraneoko txoko politenak bisitatuko dituzte.

494 izen zozketaren zakuan

Jon Silveirak pagotxa izan zuela ezin ukatu, asko izan baitira ‘Erronka’n modu batera zein bestera parte hartu dutenak. Urriko lau erronketako irabazleek (Mikel Gascak, Ramon Beitiak, Imanol Aragonek eta Lorentxo Portularrumek) hiruna puntu izan dituzte; edukiren bat bidali dutenek, bina; eta bozkatu dutenek, bana. Silveirak 334 zenbakia zuen, eta hori izan zen, hain zuzen ere, zenbaki sariduna.

ETBko ‘Eguraldia’ saioak eta eitb.com-ek antolatutako ‘Erronka’ lehiaketa arrakastatsua izan da oso. Hilabete osoan 500 argazki eta 10 bideo jaso ditugu eitb.com-eko erabiltzaileen webgunean, eta 640 bat boto. Datorren hilabetean ere, gai tematiko bat proposatzen jarraituko dugu eta akaso, beste sari bat egongo da jokoan... ;-)