Albisteak -
Hauteskunde kanpaina: UPyD
Gizarte Segurantza europarra sortzea proposatu du Maneirok
UPyDko legebiltzarkidearen esanetan, Ongizate Estatuak bi mehatxu ditu: "murrizketak" eta "nazionalistek dena zatitu nahi izatea".
Erredakzioa
Gorka Maneiro UPyDko legebiltzarkideak Gizarte Segurantza europarra sortzea proposatu du, Ongizate Estatua babesteko berme gisa. Izan ere, "murrizketen sustatzaileek eta dena zatitu nahi dutenek [nazionalistak] mehatxatuta" dagoela adierazi du.
UPyDk ekitaldia egin du Donostia Ospitalearen aurrean, eta, bertan, Manu Aguirre alderdiaren Europako hauteskundeetarako hautagaia ere izan da.
Hitzaldian, Maneirok kalitateko osasun sistema publikoa aldarrikatu du, "Mariano Rajoyren eta Iñigo Urkulluren gobernuen murrizketen aurrean". Gainera, langile publikoen egoera "gero eta prekarioagoa" dela salatu du.
EAEko UPyDko buruak pentsio sistema publiko "duina" eta Toledoko Ituna defendatzea ere eskatu du.
Horren ustez, Ongizate Estatuaren "bi mehatxu nagusiak" Espainiako Gobernuak eta Eusko Jaurlaritzak sustatukoa "murrizketak" eta "nazionalistek dena zatitu nahi izatea" dira.
Horren ildotik, Gizarte Segurantza europarra sortzea proposatu du, eta errefusatu egin du EAJk eskatutako sistema propioa.
