Albisteak -
Hauteskunde kanpaina: EAJ
PPren eta PSOEren eredua 'suntsitzailea' dela salatu du Ortuzarrek
Aitzitik, EAJren eredua "eraikitzailea" dela goratu du alderdi jeltzaleko presidenteak.
Erredakzioa
Andoni Ortuzar EAJko presidentearen esanetan, Europako hauteskundeetan bi ereduren artean hautatu beharra dago: alderdi jeltzalearen eredu "eraikitzailea" edo PSOE-PPren eredu "suntsitzailea".
EAJk hauteskunde ekitaldia egin du Barakaldon, Bizkaiko Ezkerraldean, eta, bertan, Iñigo Urkullu lehendakaria eta Izaskun Bilbao hautagaia ere izan dira.
EAJko presidentearen esanetan, PSOEk eta PPk "hutsik" utzi zuten Ezkerraldea. "Batzuek oroimen ahula dute, eta gauzak gogoraraztea komeni da: Feliperen PSOEk eta Aznarren PPk Labe Garaiak suntsitu zituzten, Babcock itxi zuten, eta ia hondoratu zuten La Naval".
Horren aurrean, EAJk "A-8 autobidea, Errontegiko zubia eta Metroa eraiki ditu, eremu ekonomiko berriak sustatu ditu, ACB enpresa suspertu zuen, Bilboko Portua handitu du eta Barakaldora BEC ekarri du".
Urkullu lehendakariaren hitzetan, Euskadiren susperraldi ekonomikoa eta enplegua "Europako gainerako lurraldeekin lotuta dago".
Izaskun Bilbaok EAJ "alternatiba" dela esan du, "porrot egin duen PPren eta PSOEren ereduaren aurrean".
