Nagua Alba Podemos Euskadiko buruak "bultzada bat" eskatu du, abenduan EAJrekin "berdinketa teknikoa" egon ostean.
Nagua Alba Podemos Euskadiko idazkari nagusi eta Unidos Podemos koalizioaren Gipuzkoako zerrendaburuak adierazi du "une historikoa" dela "Euskadin eta Estatu osoan" aldaketa gauzatzeko.
Unidos Podemosek Gasteizen eman dio hasiera hauteskunde orokorretako kanpainari, Florida parkean. Bertan, hautagaiek proiekzio bat eskaini dute, kartelak itsatsi beharrean.
EAEko Podemoseko buruak nabarmendu nahi izan du "bigarren itzuli" honen garrantzia. Izan ere, abenduan, Podemosek EAJk baino boto gehiago eskuratu zituen Euskadin, baina jeltzaleek eserleku gehiago lortu zituzten. Horregatik, "berdinketa tekniko” horren ostean, "bultzada bat" ematea eskatu du Albak, "aldaketa gauzatzeko".
Helburu horrekin, bere alderdiak "etxeko lanak" egin dituela esan du Albak, IUrekin eta Equorekin bat eginez “aldaketaren aldeko apustua” egin duelako.
Juantxo Lopez Uralde Equoko buru eta Unidos Podemosen Arabako zerrendaburuaren esanetan, konfluentzia hau ekainaren 26ko hauteskundeetako "berrikuntza garrantzitsu bakarra" da, eta "benetako aldaketa nahi duen gehiengo soziala" ordezkatzen du.
Eduardo Maura Bizkaiko zerrendaburuak adierazi du aldaketa inportantea izango dela Europan negoziatu ahal izateko.
Azkenik, Isabel Salud Ezker Anitzako koordinatzaile nagusi eta Gipuzkoako zerrendako bigarrenak ziurtatu du "konfiantza" duela eta "baikor" dagoela, "alternatiba erreala" baitira, "PPren politikek eragindako desberdintasunen, pobreziaren eta bidegabekerien aurrean".