Faktoria
Estuasuneko sukaldaritza
Biharamunean goxoago egoten diren platerez aritu da Iker Markinez
Garazi Urdanpilleta | EITB Media
Lekaleak, arraina edo haragia saltsan... Oro har, saltsadun platerak hurrengo egunean prestatu berritan baino goxoago egoten dira, eta arkume-izterra txilindron eran prestatzen irakatsi digu Iker Markinez sukaldariak.
-
Lapiko bat
11:27 min
Saltsadun platerak prestatu berritan baino goxoago egoten dira biharamunean, eta adibide bat ekarri digu Iker Markinezek, Ormaiztegiko Kuko jatetxeko sukadlariak "Faktoria"ko Estuasuneko sukaldaritza tartera: arkume-izterra txilindron saltsan:
Errezeta
-Pare bat arkume izter karratutan zatituta eskatu harakinari. Frijitzen jarri lapikoan olio tanta batekin eta gatz apur batekin.
-Bitartean, txikitu taula batean tipulin pare bat, piper morroi baten erdia eta azenario bat laukitxo txikitan. 3-4 baratxuri ale ere txikitu.
-Arkumea gorritzen hastean, barazki guztiak jarri gainean, sua erdi-mailara jaitsi, eta dena elkarrekin erregosi.
-Barazkiak eta arkumea prest daudenean, ardo txuri zorrotada bat bota, eta pixka batean utzi alkohola joan dadin. Ondoren, urez estali.
-4-5 piper-txorizero lehor hartu, haziak kendu. Ura borborka hastean bertara bota txorizeroak. Ordu erdira, txorizeroak bertatik atera, mamia kendu, txikitu, eta berriz ere lapikora bota.
- Arkumea biguina dagoenean, platera prest izango da. Baina, hurrengo egunerako utzita, salda loditu eta zaporea indartu egingo da.
