Gurpegi (Athletic-Racing): "Nahiago dut irabazi ondo jokatu baino"

Athletici errematean asmatzea falta izan zaio azken ihardunaldietan. Zuri-gorriek neurketa onak jokatu dituzte, baina emaitzak ez dira zelaian erakutsitako jokoak merezi zuen bezain onak izan. Horregatik, sei onenen artean sailkatzeko borrokan jarraitzeko lehenbailehen bueltatu behar da garaipenaren bidera. "Etxetik kanpo punturik ez irabazteak behartu egiten gaitu zaleen aurrean irabaztera", esan du Carlos Gurpegik, "nik gurago dut irabaztea ondo jokatzea baino", gaineratu du erdilari nafarrak.

Astelehenean Racingen bisita izango du Caparrosen taldeak. Santanderreko taldea borrokalaria da oso. Erraztasun gutxi ematen duen talde horietakoa. Ezerosoa. Gainera, Athleticen aurka motibazio berezia izaten du. Eta, denboraldion etxetik kanpo jarraitzaileen babesarekin baino maila hobea ematen ari da. "20 puntu eskuratu ditu etxetik kanpo. Sardineron hamaika puntu irabazi ditu. Racingek eroso jokatzen du etxetik kanpo. Jokalari azkarrak dira, kontraerasoan jokatzeko aproposak", adierazi du Andosillakoak.

Bestalde, Igor Gabilondok asteleheneko neurketaren garrantzia azpimarratu du. "Sailkapenaren goiko postuetan jarraitu gura badugu irabazi egin behar dugu Racingen kontra".