Castillo (Bartzelona-Athletic): "Ezin gara atzean sartu"

Athleticek denboraldiko partida gaitzenetako bat jokatuko du larunbatean. Talde zuri-gorriak Bartzelona ahalguztidunaren etxea bisitatuko du. Denboraldiro da gaitza Bartzelonan punturenbat eskuratzea, baina sasoion sekula baino indartsuago ari da etxean Guardiolaren taldea. Oraindik ez du partidarik galdu, eta oso gutxi izan dira galdutako puntuak.

Hala ere, partidak jokatu egin behar dira. Horrenbestez, aldez aurretik ezin da neurketa galdutzat eman. "Bartzelonaren kontrako partida guztiak dira oso gaitzak. Berdinketa ona da, baina horretarako irabaztera zelairatu behar gara", esan du Ander Iturraspek. Erdilari zuri-gorria oso maila ona ematen ari da azken jardunaldietan. Ondo ari da aprobetxatzen Orbaizen hutsunea. Hala ere, badauka zer hobetu. "Gustora ari naiz jokatzen, baina bigarren zatietan lekua galtzen dut sarri eta lasai jokatzeko esaten dit entrenatzaileak".

Camp Noun irabazteko ezin izango du lekurik galdu. Ez berak ez eta gainerako jokalariek ere. Gauza guztiak egin beharko dituzte ondo. Eta , batez ere, beldurrik barik jokatu beharko dute. "Atzean sartzen bagara lehenago edo beranduago gola egingo digute", adierazi du Castillok.