Athletic Club
Joko ona konfirmatu behar
Athletic-Mallorca: Zuri-gorriek gehiago nahi dute
Erredakzioa
Lehoiak San Mamesen denboraldiko lehen garaipenaren bila abiatuko dira asteartean (20:00etan), azken jardunaldietako joko ona puntuekin borobiltzeko asmoarekin.
Athletic Clubek Real Mallorca hartuko du San Mamesen, etxean lehenengo garaipena lortzeko asmoarekin. Fernando Llorentek golak sartzeko erraztasuna erakutsi du liga hasiera honetan, hiru jardunaldietan gola egin baitu.
Munduko txapeldunaren sasoi ona zuri-gorrien euskarrietako bat izaten ari da. Molinonen ere, Athleticek itxura ederra eskaini zuen. Partida irabazi ahal izan zuten, baina azkenean berdinketa besterik ezin izan zuten lortu Caparrosen mutilek.
Aurtenetxe gaztearen maila ona, Orbaizen lasaitasuna zelai-erdian eta Igor Martinez debutariaren lotsagabekeria eta jakina, Llorenteren nagusitasuna area inguruan, Gijonen erakutsitakoak dira eta San Mamesen konfirmatu beharko direnak.
Gijongo hamaikakoan aldaketa nabarmenik ez du egingo Joaquin Caparrosek. Iraizoz eta atzelariak ez ditu aldatuko, eta Orbaizek egindako partida politak, jarraikortasuna eman ahal diote nafarrari zelai-erdian.
Gurpegui, eskuin-hegalean sendo, postu horretantxe bertan errepika dezake, Igor Martinez bezalaxe. Aurrelari gasteiztarra, Toqueroren ordez ari den, bikain aritu zen Gijonen eta Llorenteren ''laguna'' izan daiteke berriz ere Mallorcaren aurka.
Mallorca, etxetik kanpoko estreinako garaipenaren bila
Michael Laudrupek zuzentzen duen Mallorcak etxetik kanpo garaipenik ez du, aurreko irteeran 2-0 galdu baitzuen Gijongo Sportingen aurka.
Laudrupek Dudu Aouate eta Nunes berreskuratuko ditu. Danimarkako teknikariaren kezka nagusia Gonzalo Castroren orkatila da eta horregatik 19 jokalari sartu ditu deialdian.
Mallorcak lau puntu batu ditu lehenengo hiru jardunaldietan. Bat Real Madrilen aurkako berdinketarekin eta beste hiruak Atletico Madrilen aurkako garaipenarekin batuak.
Ustezko hamaikakoak:
Athletic Club Bilbao: Iraizoz; Iraola, San José, Amorebieta, Aurtenetxe; Gurpegui, Orbaiz, Javi Martínez, Gabilondo; Igor Martínez, Llorente.
R. Mallorca: Aouate; Cendros, Nunes, Ramis, Kevin; Nsue, Martí, De Guzmán, Pereira; Víctor, Cavenaghi.
Epailea: Fernando Teixeira Vitienes
Futbol-zelaia: San Mames
Ordua: 20.00 hora
