Reala-Athletic: Griezmann eta Muniain gazteen derbia

Biek ala biek futbolerako berebiziko gaitasuna dute, baina batez ere euren nortasun bereziek ematen du zeresana zaleen artean. Gazteak eta inolako lotsarik gabe, haize freskoa eraman dute Anoetako eta San Mameseko zaleengana.

Azkarrak eta zuzenak dira bai soropilean eta baita bertatik kanpo ere. Biek ere gainera, lidergorako dohaina ere badute, eta zalantzarik gabe, etorkizun oparoa.

Antoine Griezmann (Maçon, 1991/03/21). Kalitateak ez du mugarik bere hanketan eta bertute ugari dituen erasoko jokalaria da. Xabi Prieto, Joseba Llorente eta Raul Tamudo beteranoentzat osagarririk onena.

Griezmannek golak ospatzeko dituen era xelebreak ere zaleak suspertzen ditu, ezbairik gabe. Publizitate-auto baten gainean gidari, baloiak biltzen dituen mutiko baten aulkian eserita edo elur artean dantzan ikusi dugu Maçonekoa. Bere golen ospakizunek bere golek adina arrakasta dute.

Iker Muniain (Iruñea, 1992/12/19), atrebentziaren mailarik gorenean agertzen zaigu. Txiki-txikitatik futbolaz gozatu du baloiarekin alde batera eta bestera mugituz eta zaleak gozatuaraziz. Lehenengo Mailan behe-mailetan egiten zuena egiten jarraitzen du. Ez gehiago eta ez gutxiago; eta ez doakio batere txarto.

Berezkoa duen atrebentzia hori bere agerraldi publikoetan ere agerian utzi ohi du, ez baitu arazo handirik izaten buruan duen hori esateko. Prentsa-aretoan egindako azken agerraldian ez zuen izkutatu ez duela Osasuna maitatzeko arrazoi handirik, eta bere egin zuen Txantreako lagunek esandakoa: "Astindu behar ditugula (Osasunakoak) esan didate". Hilabete batzuk lehenago, barrerai ezin eutsiz, Joaquin Caparrosek agindutako lekuan jokatuko zuela adierazi zuen kazetarien aurrean.