Athletic Club
Riazorren
Deportivo-Athletic (2-1): Bilbotarrek bizia eman diete galiziarrei
Josu Bilbao
Erredakzioa
Zuri-gorriek ez dute partida ona jokatu eta Lotinaren mutilek, intentsitate gehiago ezarriz, agindu dute zelaian. Castillok bere atean sartutako golak norgehiagoka erabakita utzi du.
Caparrosen taldearentzat ezin hobeto hasi da norgehiagoka, lehen zatiko 3. minutuan 0-1ekoa jarri baitu Gaizka Toquerok. Partidako lehen jaurtiketan, aurrelari gasteiztarrak denboraldiko zazpigarren gola lortu. Athletic aurretik jarri da markagailuan eta Deportivok ezin izan du arriskurik sortu. Llorentek bigarren gola lortzeko abagune ederra izan du, baina aurrelari zuri-gorriak kanpora bidali du jaurtiketa gurutzatua.
Lotinaren taldea Iraizozen ate ingurura hurbiltzen hasi da pixkanaka eta 21. minutuan Adrianek berdinketa lortu du (1-1). Aurrelari zuri-urdinaren erremateak Gurpegik jo du eta baloia sare barrura sartu da. 1-1ekoarekin galiziarrek gehiago agindu dute, baina bizkaitarrek bigarren gola lortzeko aukera bikaina izan dute 26. minutuan. Hala ere, Llorenteren errematea langara joan da. Atsedenaldian berdinketarekin joan dira bi taldeak.
Atsedenaldiaren ostean, Lotinaren taldeak asko sakatu du erasoan eta bizkaitarrek intentsitatea galdu dute. 55. minutuan, Rikik gol aukera argia izan du, baina Iraizozek ederki desbideratu du aurrelari zuri-urdinaren jaurtiketa. Deportivo, Athletic gehiago izan da bigarren zatian eta Xabi Castillok 2-1ekoa jarri du 69. minutuan. Durangoko hegalariak bere atean sartu du gola, ezin izan baitu Adrianen erdiraketa kanpora desbideratu.
Caparrosen mutilek ez dituzte gol aukerak sortu partida berdintzeko, Galiziako taldea sendo mantendu delako defentsan. Hala ere, bigarren zatiko 43. minutuan, Gaizka Toquerok berdinketa lortzeko abagune bikaina izan du. Gasteiztarraren errematea kanpora joan da eta garaipena Deportivorentzat izan da Riazorren.
- Fitxa teknikoa:
2 - Deportivo: Aranzubia; Laure, Lopo, Colotto, Manuel Pablo; Juan Rodriguez (Aythami; 78. minutuan), Ruben Perez, Guardado; Riki (Juan Dominguez; 90. minutuan), Valeron eta Adrian (Lassad; 85. minutuan).
1 - Athletic: Iraizoz; Iraola, Ekiza, Amorebieta, Castillo; David Lopez (Gabilondo; 68. minutuan), Gurpegi (Iturraspe; 57. minutuan), Javi Martinez (Ibai Gomez; 76. minutuan), Muniain; Toquero eta Llorente.
Golak: 0-1; 3. minutuan, Toquero. 1-1; 22. minutuan, Adrian. 2-1; 71. minutuan, Castillok&' || 'nbsp; (bere atean).
