Athletic Club
Santiago Bernabeun
Real Madril-Athletic (4-1): Zuriek Athleticen jokoa ezereztu dute
Erredakzioa
Bielsaren mutilek lehen zati ona egin dute, baina bigarren zatian epaileak aurka bi penalti adierazi ditu eta De Marcos egotzi du. Ondorioz, zuri-gorriak erreakzionatzeko aukerarik gabe geratu dira.
-
Bernabeun jokatutako partidaren une bat. Argazkia: EFE
Fitxa teknikoa:
Real Madril: Iker: Arbeloa, Ramos, Varane, Marcelo; Granero (Lass, 73. minutua), Xabi, Ozil; Kaka (Callejon, 78. minutua), Cristiano eta Benzema (Higuain, 67. minutua).
Athletic: Iraizoz; Iraola, Javi Martinez, San Jose, Amorebieta (Ibai, 61. minutua); Iturraspe, Herrera, De Marcos; Susaeta (Iñigo Perez, 67. minutua), Llorente (Toquero, 61. minutua) eta Muniain.
Golak: 0-1, 13. minutua: Llorente; 1-1, 25. minutua: Marcelo. 2-1, 47. minutua: Ronaldo, penaltiz. 3-1, 67. minutua: Ronaldo, penaltiz. 4-1, 85. minutua: Callejon.
Athleticek berriro galdu du Santiago Bernabeun, nahiz eta lehenengo zati oso ona jokatu. Zuri-gorriek aurre egin diote Real Madrili aurreneko zatian, baina bigarrenean desagertu egin dira.
Partida oso ausart hasi du Athleticek, Real Madrili aurre egin eta zenbait unetan norgehiagoka kontrolatu du. Bielsaren jokalariek ez dute estiloa aldatu Santiago Bernabeun eta Casillasen atea izan dute helburu.
Pare bat aukera izan eta gero bilbotarrek 0-1ekoa egin dute kontraeraso ezin hobe batean. Herrerak hegalera zabaldu du baloia, Javi Martinezek jaso, burua altxatu eta erdiraketa egin du. Aiegikoaren erdiraketa modu paregabean errematatu du Llorentek sareetara.
Gola sartu eta zuri-gorriek berdin jarraitu dute. Athleticek aukeraren bat sortu du, baina ez du golik egin. Horrela, zurien jokaldi bakartu batean berdinketa etorri da. Marcelok berdinketaren gola sartu du.
Bielsaren mutilek erreakzionatu eta berdin jokatzen jarraitu dute, hau da, zurien arean arriskua sortzen saiatu dira. Atsedenaldiaren atarian Llorentek aukera ezin hobea izan du, baina bakarrik Casillasen aurrean baloia kanpora bidali du.
Bigarren zatia berehala okertu da, izan ere, aurreneko minutuan Iturraspek Kakari penaltia egin eta Ronaldok ez du barkatu.
Zuri-gorriek ez dute burua altxatu eta zurien kontraeraso batean De Marcosek beste penalti bat egin du. Gainera, jokaldi berean arabarra egotzi du epaileak. Ronaldok hirugarrena sartu eta partida erabakita utzi du.
Zuri-gorriak baloia oinetan izaten saiatu dira gol gehiago ez jasotzeko, baina ez dute lortu. Izan ere, Callejonek laugarrena sartu du beste kontraeraso batean. Gainera, Higuainek beste baloi bat zutoinera bidali du.
