Athletic Club
Bartzelona-Athletic
Guardiola: 'Athletic Europako sentsazioa da'
Erredakzioa
Zuri-gorriak Europa League txapelketa irabazteko faborito argiak direla esan du teknikari katalanak. Gainera, Marcelo Bielsaren lana goraipatu egin du Pep Guardiolak.
Athleticek Bartzelonaren aurka jokatuko du Ligako 31. jardunaldia bihar Camp Nou estadioan eta Guardiolak zuri-gorriak goraipatu egin ditu prentsaurrekoan. Entrenatzaile katalanaren ustez, "Athletic Europako sentsazioa da" eta Europa League txapelketa irabazteko faborito nagusia.
"Irabazi, berdindu eta galdu dezakete, baina beti sortzen dituzte gol aukera ugari. Zuzenak dira eta guztiak heltzen dira erremate postuetara. Hutsuneetara hain gogor doan talderik ez dut inoiz ikusi", azaldu du Guardiolak.
Athletic jokatzen ikustea "plazerra" dela gaineratu du Bartzelonako prestatzaileak. Futbol erakargarria egiten dutela eta baloi guztiak "borrokatzen" dituztela azpimarratu du Guardiolak.
Marcelo Bielsarentzat ere hitz politak izan ditu katalanak. "Bielsak munduko edozein klub entrenatu dezake beti hobetzen baititu taldeak", esan du.
Gainera, Guardiolak "egutegia den bezalakoa" dela argitu du Bartzelonak atsedena hartzeko zuri-gorriek baino 24 ordu gehiago izango baititu. "Astean behin jokatuko balu Athletic gaindiezina izango litzateke" adierazi du teknikari blaugranak.
