Athletic Club
2-0, Camp Nou estadioan
Athleticek aurpegia eman du Bartzelonaren aurkako porrotean
Erredakzioa
Lehenengo zatian Iniestak jarri du 1-0ekoa eta bigarren zatian Mateu Lahoz epaileak, erratuta, penaltia adierazi du Bartzelonaren alde. Messik azken 2-0ekoa jarri du markagailuan Iraizoz gaindituta.
-
Barcelona-Athletic. Argazkia: EFE
Galeriak (1)
Informazio gehiago (1)
- Fitxa teknikoa:
2 - Bartzelona: Valdes; Alves, Pique, Mascherano, Adriano, Sergio Busquets, Thiago, Iniesta (Xavi, 77. minutuan), Alexis (Keita, 83. minutuan), Messi eta Tello (Pedro, 62. minutuan).
0 - Athletic Club: Iraizoz, Iraola, Javi Martinez, Ekiza, Aurtenetxe, Iturraspe, Iñigo Perez (Ander Herrera, 46. minutuan), De Marcos, Susaeta, Ibai (Muniain, 46. minutuan) eta Toquero (Llorente, 59. minutuan).
Golak: 1-0, 40. minutuan: Iniesta. 2-0, 58. minutuan: Messi, penaltiz.
Bartzelonak ezin izan du ohiko jokoa gauzatu partidako aurreneko minutuetan Athleticek presio bikaina egin baitu erasoan. Hala ere, Guardiolaren mutilek aurrrapausoa eman dute berdegunean eta arriskua sortzen hasi dira. Neurketako lehenengo aukera Piquek izan du, baina atzelariaren jaurtiketa zuzenean kanpora joan da. Gaizka Toquerok eman du zuri-gorrien erantzuna, baina gasteiztarraren errematea oso desbideratuta kanpora joan da.
Iraizozek gelditu erabakigarriak egin behar izan ditu lehenengo zatian. Adibide argiena Leo Messiri 24. minutuan egindako gelditu iksugarria izan da. Argentinako jokalariak Iraizoz ezustean harrapatu nahi izan du falta azkar jaurtita, baina atezain nafarrak gelditu bikaina egin du. Jarraian, Aurtenetxek langa azpitik atera du Piqueren errematea eta Bilboko taldeak sufritzen jarraitu du. Blaugranen gola, 39. minutuan eskuratu du Andres Iniestak (1-0) jaurtiketa gogor batekin.
Muniain eta Herrera Iñigo Perezen eta Ibairen ordez zelairatu ditu Bielsak bigarren zatian eta Athleticek baloiaren jabetza gehiago mantendu du. Hala ere Guardiolaren taldeak erasoan sendo jarraitu du eta 57. minutuan Mateu Lahoz epaileak zuri-gorrien aurkako penaltia adierazi du. Tellok bere burua lurrera bota du, baina Mateu Lahozek Javi Martinezen bultzakada adierazi du. Messik 2-0ekoa ezarri du markagailuan penaltia gauzatuta.
Norgehiagokako azkenengo minutuetan Bielsaren taldeak gehiago sakatu du erasoan eta Piquek Muniainen errematea langa azpitik ateratzea lortu du (79. minutuan). Bartzelonak ere hirugarren gola lortzeko abaguneak izan ditu, baina Keitaren jaurtiketa langara joan da 88. minutuan. Azkenean, hiru puntuak Kataluniako taldeak eskuratu ditu 2-0ekoari esker.
