Osasuna
Levantera doa
Clercek ez du Osasunan jarraituko, kontratua berritzeko eskaintza baztertu ostean
Erredakzioa
Hiru denboraldi talde gorritxoan eman eta 97 partida ofizial jokatu ondoren, Levanten jokatuko du datorren denboralditik aurrera.
-
Carlos Clerc. Argazkia: @CAOsasuna
Carlos Clerc jokalariak ez du Osasunan jarraituko. Hegaleko defentsa kataluniarrak, baztertu egin du Osasunak kontratua berritzeko egin dion eskaintza. Ondorioz, libre geratuko da ekainaren 30etik aurrera. Hala jakinarazi du klubak, webgune ofizialean.
Talde gorritxoan denboraldi honetan minutu gehien jokatu dituen futbolaria izan da. Oso jokalari garrantzitsua izan da Jagoba Arrasate entrenatzailearentzat. Oraindik ofiziala ez den arren, Carlos Clercek Levanten jokatuko du datorren denboralditik aurrera.
Hiru denboraldi talde gorritxoan eman eta 97 partida ofizial jokatu ditu. Datorren larunbatean Osasunak Oviedoren aurka jokatuko duen neurketan izango du zale gorritxoei agur esateko aukera Carlos Clercek.
