Andres Fernandez: ‘Lasai-lasai egiten dut lo’

Andres Fernandez Osasunako atezainak igandean Santiago Bernabeun Real Madrilen kontra jokatuko duela eta amesgaiztorik ez duela esan du. “Ez, amesgaiztorik ez. Oso ondo egiten dut lo, lasai-lasai”, adierazi du Murtziako atezainak.

Fernandezek igandeko partida “nahiko zaila” dela adierazi du, baina taldeak sentsazio onekin amaitu behar du, haren ustez, “zelaian guztia utziz”. “Ez naiz irudi ona ematearekin konformatzen. Garrantzitsuena ahal dugun ondoen jokatzea da, eta ikusiko dugu. Punturen bat edo garaipena lortzen bada, oso ondo, eta, aurkaria hobea bada, zoriondu egingo dugu”, atezain gaztearen hitzetan.

Murtziako atezaina titularra izango da Santiago Bernabeun, duela bi denboraldi Osasuna Bn eta iaz Huescan jokatu eta gero.