Futbola
Asteartean, 20:00etan
Eibarrek beste ezusteko bat eman nahi du Malagaren kontra
Erredakzioa
Armaginak defentsan sendo aritu beharko dira eta Ipuruako futbol-zelaiaren ezaugarriak aprobetxatu beharko dituzte Rosaledara aukerekin heltzeko.
Albisteak (1)
Eibarrek beste ezusteko bat eman nahi du asteartean, Errege Kopako final-zortzirenetan. Armaginek Malaga hartuko dute Ipuruan, joaneko neurketan (20:00etan).
Eibar Kopan bizirik dagoen Bigarren B Mailako talde bakarra da. Ipuruako sendotasuna aprobetxatu behar dute gipuzkoarrek aurrera egiteko; izan ere, armaginek ez dute denboraldi honetan etxean porrotik jaso. Athletic berdinketa bat urratzeko gai izan den talde bakarra da, Errege Kopako final-hamaseirenetako joaneko norgehiagokan.
Gaizka Garitano aulkian dela Marcelo Bielsaren Athletic Kopatik at utzi zuten gipuzkoarrek, San Mamesen bana berdindu eta gero. Armaginak berriro defentsan sendo aritu beharko dira eta Ipuruako futbol-zelaiaren ezaugarriak ondo aprobetxatu beharko dituzte Rosaledara aukerekin heltzeko. Pellegrini Andaluziako taldearen entrenatzaileak ez ditu orain arte bere ibilbidean emaitza onak lortu Kopan.
Bestalde, Malagako jarraitzaileek ez dute Cacereñok emandako sustoa ahaztu, final-hamaseirenetako kanporaketa ia ametsgaizto bihurtu baitzen. Julio Cobosen taldeak Malaga 0-1 hartu zuen mendean, Rosaledan, baina etxetik kanpo lortutako golen balio bikoitzak sailkapena eman zion Andaluziako taldeari. Joaneko partidan 3-4 nagusitu zen Malaga.
Manuel Pellegrini Malagako entrenatzaileak zazpi jokalari garrantzitsuri atsedena ematea erabaki du. Horrela, Jesus Gamez eskuin hegalekoa, Martin Demichelis atzelari argentinarra, Joaquim erdilaria, Isco erdilari aurreratua, Eliseu erdilaria, Francisco Portillo euskarria eta Roque Santa Cruz aurrelaria etxean utzi ditu.
Ustezko hamaikakoak:
Eibar: Xabi Irureta; Boveda, Añibarro, Raul Navas, Bingen; Errasti, Dani Garcia; Abaroa, Arruabarrena, Ruben Arroyo; eta Mainz.
Malaga CF: Kameni; Jurado, Weligton, Sergio Sanchez, Monreal; Sebastian Fernandez, Iturra, Recio, Duda; Buonanotte eta Saviola.
Epailea: Jose Antonio Teixeira Vitienes
Futbol-zelaia: Ipurua.
Ordua: 20:00.
