Bere atean zortzi gol sartu zituen taldea ikertzen ari dira Italian

Italiako Bagheria taldeak zortzi gol egin zituen bere atean, eskualdeko kopa partidako azken 10 minutuetan. Borgata Terrenoveren aurka jokatutako neurketa 14 eta 3 amaitu zen, eta gertatutakoak iskanbila eragin du Italiako futbolean.

Hori dela eta, Italiako Futbol Federazioak (FIGC) ikerketa egingo du partida hartan gertatutakoa aztertzeko. Borgata Terrenove eta Bagheriaren multzoan hirugarren talde bat zegoen, Partinicaudace. Hiru taldeek Prima Categoria delakoan jokatzen dute, Italiako zortzigarren mailan.

Bagheriak puntu bakarra behar zuen sailkatzeko, eta, partida amaitzeko 10 minutu falta zirenean, 4 eta 3 galtzen ari zen. Orduan, Borgatak bi gol egin zituen, eta orduan etxeko jokalariak zur eta lur geratu ziren aurkariek euren atean golak bata bestearen atzetik sartzen zutela ikusita. Partida 14 eta 3 amaitu zen, eta horri esker Borgata Terrenove hurrengo faserako sailkatu zen sartutako eta hartutako golen arteko aldeari esker, Partinicaudace kanpoan utzita.

"Ordura arte partida oso borrokatua izan zen, baina Bagheria iruzur egiten hasi zen. Kapitainak esan zidanez, nahiago zuten gu hurrengo faserako sailkatzea Partinicaudace sailkatzea baino", azaldu du Ignazio Chianetta Borgata taldeko entrenatzaileak.

Fiskalei, salaketa

Giovanni Cammarata Partinicaudace taldeko entrenatzaileak, berriz, bi taldeen artean "akordiorik" ez zegoela azpimarratu du. "Ezin dut zortzi gol horien arrazoia ulertu. Horrek ez du futbolarekin zerikusirik, eta Federazioak gertatutakoa ikertzea espero dut".

Bestalde, Sandro Morgana eskualdeko federazioko arduraduna haserre agertu da gertatutakoarekin. "Fiskalei gertatutakoaren berri emango diet, eta kasua aztertu egingo dute, zein zigor jarri behar den erabakitzeko".