Alaves, Osasuna eta Bilbao Athletic, hirugarren jardunaldirako prest

Alaves eta Osasuna, Adelante Ligako liderretako bi, sailkapeneko goialdean jarraitzen saiatuko dira igande honetan, hirugarren jardunaldian; Llagostera (17:00etan) eta Almeria (19:15ean) bisitatuko dituzte, garaipenen boladari jarraipena emateko asmoarekin. Bilbao Athletic, bere aldetik, lehen puntuak lortzeko ilusioarekin irtengo da San Mamesera (igandean ere, 12:00etan), Mallorca aurkari duela.

Alaves, fidagarritasunari eusteko

Palamoseko Nou Estadin, Pepe Bordalasen Alavesek nahi du berreskuratu Huescan (2-3) eta Gasteizen Oviedoren aurka (2-0) erakutsi zuen fidagarritasuna. Bi partida horietan erdietsitako sei puntuei esker lehen postuan da Alaves, Numantzia eta Osasunarekin batera. Neurketa igandean jokatuko dute, 17:00etatik aurrera.

Aurrean, bestelako egoeran dagoen taldea izango dute, alegia, Llagostera. Lluis Carrilloren taldeak ez du punturik oraindik; izan ere, Osasunaren eta Lugoren aurka galdu du (0-2 eta 1-0).

Osasuna, jaitsi berri den talde baten aurka

Garaipenen boladari eustea, halaber, Osasunaren jomuga izango da. Juegos Mediterraneos futbol-zelaia bisitatuko dute Enrique Martin Monrealen gizonek, Llagosteran (0-2) eta Mirandesen aurka Sadarren (1-0) irabazi ostean. Almeriak, berriz, Zaragozan galdu zuen aurreko jardunaldian, 3-2. Partida igandean jokatuko dute, 19:15etik.

Bilbao Athletic, lehen puntuen bila

Sailkapeneko beste muturrean, Bilbao Athletic txapelketako bere lehen puntuak lortzen saiatuko da, mallorcaren aurka. Zuri-gorriek Gironaren (0-1) eta Elxen (2-1) kontrako partidak galdu dituzte; bitartean, balearrek Alcorconen porrota jaso zuten (2-0), baina Ponferradinaren aurka hiru puntuak eskuratu zituzten (1-0 irabazita).

Cuco Zigandaren mutilek igandean jokatuko dute, 12:00etatik aurrera, San Mamesen.