Real Madrilek Errege Kopa irabazi du

Real Madrilek lortu du Errege Kopa, Bartzelona 0-1 gaindituta. Partidako gola, luzapeneko lehen zatian lortu du Cristiano Ronaldok erremate eder bati esker.

Lehenengo zatian talde katalanak norgehiagokaren kontrola izan du, baina Real Madrilek gol aukera gehiago sortu ditu. Lehen abagune argia Cristiano Ronaldok izan du 11. minutuan, baina aurrelari zuriak ezin izan du Pinto gainditu jaurtiketa ahul batekin. Mourinhoren mutilek sakatzen jarraitu dute eta Guardiolaren taldea ez da eroso egon erasoan. 35. minutuan Cristiano Ronaldok bigarren aukera izan du eta Pintok geldiketa erabakigarria egin behar izan du jokalari merengearen zartakoa gelditzeko. Pepek izan du lehen zatiko aukerarik garbiena 43. minutuan. Atzelari zuriak ezin hobeto errematatu du Ozilen erdiraketa, baina baloia zutoinera joan da. Atsedenaldira, 0-0ekoarekin joan dira bi taldeak.

Bigaren zatian Bartzelonak gol aukera asko izan ditu eta Iker Casillas protagonista nagusia bilakatu da. 74. minutuan, Madrileko atezainak geldiketa erabakigarria egin dio Messiri eta minutu bat geroago Pedroren zartakoa desbideratzea lortu du. Norgehiagokaren 80. minutuan, Iniestak gola lortzeko aukera paregabea izan du, baina Casillasek beste geldiketa erabakigarria egin du. Real Madrilek ere bere aukera izan du 89. minutuan eta Pintok Di Mariaren jaurtiketa desbideratzea lortu du. Horrela, partida luzapen denborara joan da.

Luzapeneko lehen zatian Real Madrilek asko skaatu du erasoan eta Cristiano Ronaldok 0-1ekoa lortu du erremate eder batekin. Di Mariak erdiraketa zehatza jarri dio portugaldarrari eta aurrelari zuriak Pinto gainditu du gola lortuz.

Luzapeneko bigarren zatian Guardiolaren mutilek gola bilatu dute, baina katalanek ezin izan dute arrisku handirik sortu. 119. minutuan, Di Maríak bigarren txartel horia ikusi du, baina Bartzelonak ezin izan du berdinketa lortu.

Fitxa teknikoa:

.0. Bartzelona: Pinto, Alves, Pique, Mascherano, Adriano (Maxwell, 119. minutuan), Xavi, Busquets (Keita, 108. minutuan), Iniesta, Pedro, Messi eta Villa (Afellay, 105. minutuan).

.1. Real Madril: Casillas, Arbeloa, Sergio Ramos, Carvalho (Garay, 119. minutuan), Marcelo, Pepe, Xavi Alonso, Khedira (Granero, 104. minutuan), Ozil (Adebayor, 70. minutuan), Cristiano Ronaldo eta Di Maria.

Gola: 0-1, 103. minutuan: Cristiano Ronaldok.