Real Madrilek 1-2 irabazi du Bartzelonan

Fitxa teknikoa:

1 - Bartzelona: Valdes; Puyol, Mascherano, Adriano (Pedro, 73. minutuan); Alves, Busquets, Xavi (Alexis, 69. minutuan), Thiago; Tello (Cesc, 81. minutuan), Messi eta Iniesta.

2 - Real Madril: Casillas; Arbeloa, Pepe, Ramos, Coentrao; Khedira, Xabi Alonso; Di Maria (Granero, 73. minutuan), Özil (Callejon, 89. minutuan), Cristiano; eta Benzema (Higuain, 90+3. minutuan).

Golak: 0-1, 17. minutuan: Khedira. 1-1, 70. minutuan: Alexis. 1-2, 73. minutuan: Cristiano Ronaldo.

Real Madrilek garaipen bikaina eskuratu du Bartzelonaren aurka (1-2) eta Liga ia erabakita utzi du sailkapen orokorrean 7 puntuko alde baitute Mourinhoren mutilek. Khedirak lortu du partidako aurreneko gola 16. minutuan, baina Alexis Sanchezek 1-1ekoa jarri du 69. minutuan. Hala ere, Cristiano Ronaldok, kalitate handiko jaurtiketa batekin, azken 1-2koa jarri du Camp Nou estadioko markagailuan.

Mourinhoren mutilak nagusi izan dira aurreneko minutuetan eta partidako lehenengo abaguneak talde madrildarrak izan ditu. Lehenengo zatiko 4. minutuan Cristiano Ronaldoren errematea ederki desbideratu du Valdesek eta 10. minutuan Bartzelonako atezainak gelditu erabakigarria egin du Benzemaren jaurtiketa harrapatuta. Pixkanaka Guardiolaren mutilek norgehiagokaren kontrola hartu dute eta erdilari blaugranak izan dira berdeguneko protagonista nagusiak.

Bartzelonak baloiaren jabetza izan du, baina Khedirak 0-1ekoa jarri du markagailuan. Puyolek ezin izan du baloia aldendu eta alemaniarrak neurketako aurreneko gola lortu du 16. minutuan. Berdinketaren gola lortzeko abagune bikaina izan du Xavik 26. minutuan, baina erdilari katalanaren saiakera Casillasek maisuki desbideratu du kornerrera. Lehenengo zatiko azkenengo minutuetan Guardiolaren taldeak gola lortzeko saiakerak egin ditu, baina Real Madril bikain aritu da defentsan.

Atsedenaldiaren ostean Tellok gola lortzeko abagune ederra izan du, baina jaurtiketa langa gainetik desbideratuta joan zaio gazteari. Bartzelonak baloiaren jabetza mantendu du, baina Mourinhoren taldeak sendotasun ikusgarria erakutsi du defentsan eta Guardiolaren mutilek ezin izan dituzte gol aukera argiak sortu bigarren zatiko aurreneko minutuetan.

Alexis Sanchez Xaviren ordez zelairatu du Pep Guardiolak eta aurrelari txiletarrak 1-1ekoa jarri du markagailuan aldaratze bat ederki aprobetxatuta. Kataluniako taldeak 69. minutuan lortu du berdinketaren gola, baina 72. minutuan Cristiano Ronaldok talde zuriaren bigarren gola eskuratu du. Portugaleko jokalariak ederki gainditu du Valdes buruz burukoan eta Real Madrilen azken 1-2koa jarri du Camp Nou estadioko markagailuan.