Futbola
EA Sports Liga
Vila-realek Pacheta entrenatzailea kargugabetu du
EITB Media
Jose Rojo 'Pacheta'k Castelloko taldeko entrenatzaile izateari utzi dio. Bi hilabete eman ditu karguan. Marcelino Garcia Toralek ordezkatu dezakeela jakinarazi du EFE Agentziak.
-
Pacheta, Vila-realek Athleticen aurka azaroaren 5ean jokatu zuen partidan. Argazkia: Foto: EFE
Vila-realek Jose Rojo Pacheta entrenatzailea kargugabetu du, ostiral honetan, azaroaren 10ean. Quique Setien ordezkatu zuen duela bi hilabete, baina ez du jarraituko Castelloko taldea zuzentzen. EFE albiste agentziak jakinarazi duenez, Marcelino Garcia Toral izango da Vila-realeko hurrengo entrenatzailea.
Ostegunean, azaroak 9, 'urpeko ontzi horiak' 1-2 irabazi zion Makabi Haifari Europa Ligan, partida txarra jokatuta, eta duela lau egun, igandean, EA Sports Ligan, 2-3 galdu zuen Athleticen kontra. Bi partida horietan emandako maila eta taldearen bolada txarra nahikoa izan dira klubeko zuzendaritzarentzat Pacheta kargutik kentzeko.
Ligan sailkapeneko 13. postuan da Vila-real, 12 punturekin, 3 garaipen lortuta, 3 berdinketa erdietsita eta 6 norgehiagoka galduta. Europa Ligan, aldiz, bigarren da F multzoan, 6 punturekin, Rennes (9 puntu) liderra eta Panathinaikos (4 puntu) hirugarrena baino partida bat gutxiago jokatuta.
