Futbola
Ukondokada Cristiano Ronaldori
Lehiaketa Batzordeak ez du David Navarro zigortuko
Erredakzioa
Levanteko defentsak nahita eman zion ukondokada Cristiano Ronaldori, baina ez du zigorrik jasoko. Iragan jardunaldian Soldadok burua zapaldu zion Falcaori, baina honek ere ez zuen zigorrik jaso.
David Navarrok nahita eman zion ukondokada Cristiano Ronaldori Levante-Real Madril partidan, eta portugaldarrari bekaina zabaldu zion.
Cristiano Ronaldo odoletan utzi zuen David Navarroren ukondokadak, baina Real Madrileko jokalaria zelaira sartu zen medikuen zauria itxi ostean, eta gola sartu zuen (0-1). Bigarren zatia, ordea, ezin izan zuen jokatu zorabiatuta zegoelako. Txartel gorria merezi zuen David Navarrok ukondokadagatik, baina epaileak ez zion txartelik atera, ezta horia ere.
Tamalgarria eta futbolarentzat kaltegarria izan zen Navarrok Real Madrilen aurka egin zuena, baina Espainiako Futbol Federazioaren Lehiaketa Batzordea ez da ofizioz sartuko kasuan. Navarrok aurrekari larriak ditu, baina lasai jarraitzen du futbolean jokatzen.
Navarrok Fernando Llorenteri ukondokada eman zion Athleticen aurka, eta puntuak eman behar izan zizkioten jokalari zuri-gorriari. Luis Figori belaunera zuzendutako sarrera egin zion. Figok jokatzen jarraitu zuen, baina sarrera, haren kirol ibilbidea amaitzeko modukoa izan zen. Txapeldunen Ligako Valentzia-Inter Milan partidan tangana egon zen, eta David Navarro izan zen protagonista. Partida amaieran Burdissori ukabilkada eman zion bizkarretik, eta UEFA izan da jokalari hau epe luzerako zigortu duen erakunde bakarra. Zazpi hilabeteko zigorra ezarri zion UEFAk Navarrori. Lionel Messik ere jasan du Navarroren joko bortitza. Navarrok Messi gogor zapaldu zuen, baina zorionez argentinarra ez zen lesionatu.
Lehiaketa Batzordea beste kasu arinago batzuetan ofizioz sartu da, baina oraingoan ez du neurririk hartuko. Iragan asteburuan Roberto Soldadok Falcaori burua zapaldu zion, baina Valentziako aurrelariak ez zuen inolako zigorrik jaso.
