Kordoba-Reala: Bada garaia

Kordoban jokatuko dute larunbat honetan txuri-urdinek (ETB1en, 18:00etan) eta gaur amaitu dituzte prestaketa lanak Zubietan. Jarraian abiatu dira Andaluziaruntz, bi txandatan: lehenik Zaragoza autobusez eta bertatik trenez iritsiko dira.

Martin Lasarte entrenatzaileak bazuen non aukeratua deialdia osatzerakoan Labaka eta Dani Estrada baino ez daudelako min hartuta eta aldaketa bakarra egin du: Songo''oren tokian Nsue sartu. Prieto berragertuz geroztik, zerrendan sartu nahirik ari dira bi jokalariok. Oraingoz, aste batean kamerundarrari dagokio eta hurrenagokoan mallorkarrari. Biak ala biak deialdian izateko, Estrada kolonbiarra baztertu beharko luke entrenatzaileak eta oraingoz ez du aukera hori hobetsi.
Levante mendean hartu zuen talde bera jarriko du hasieratik Arcangel Berria zelaian Lasartek. Joan den astean, Gonzalez eta Bueno izan ziren bi berritasunak eta taldean jarraituko dute.

Realaren helburu bakarra hiru puntuak patrikaratzea da. Urtarrila erdialdean Celta Balaidosen garaitu zuenetik ez du halakorik lortu. Lantegia ez da samurra izango. Etxeko partidak aintzat hartuz, zortzigarren postuan ageri da Kordoba (zazpi garaipen, bost berdinketa eta hiru porrot) eta Alcarazek zuzentzen duen taldeak 50 puntura iritsi nahi du lehenbailehen. Betisek esaterako, ozta-ozta lortu zuen garaipena Victor Fernandezen debut egunean eta Herculesek, aldiz, berdindu egin zuen.
Neurketa amaitu bezain pronto etxera bidean jarriko dira gipuzkoarrak eta heldu den asteartean ekingo diote Herculesen aurkako lehia interesgarria prestatzeari.