Lasarte: "Hortzak estutuz eta motibazioz gainezka zelairatuko gara"

"Neurketari dagokionez, funtsezkoena garaipena da. Konnotazioek ez dute lekurik niretzat. Oso oso neurketa garrantzitsua izango da bi taldeentzat, kito". Martín Lasartek garbi utzi nahi izan du jokoaren muinak baino ez diola ardura eta hortik haragoko irakurketak bost axola zaizkiola. Premia handiagoan iritsiko da Real Union, huts egiteko marjina murritzagoa baitu. Hala ere, ez du uste horregatik Reala baino indartsuago aterako direnik. "Ez dute amore eman eta bizi-bizi daude. Bistan da, motibatuta eta irabaztera aterako direla. Horretan behintzat, parean gaude, hortzak estutuz eta motibazioz gainezka zelairatuko garelako".

Borroka ezberdinetan egonagatik ere bi taldeek garaipena beharrezkoa dute euren helburua patrikaratzeko. Hala nahiago Lasartek. "Ez dira atze-atzean sartu eta gure zain geratuko, inondik ere. Irabaztea ezinbestekoa dute eta gisa horretako talde baten kontra jokatzea onuragarriagoa da guretzat. Irabazi ala irabazi. Kito, ez dago besterik. Ez dago hortik aparteko beste ezer". Gain-sariekin arituko direnez ari zen noski.

Jakin badaki aurkari gogorra izango dutela parean Gal futbol zelaian. "Talde bertikala da Union, animo aldetik ongi daude, estrategia jokaldiak menperatzen ditu, fisikoki ahaltsua da… azken neurketan ongi ikusi nituen". Eta zeure mutilak nola daude? "Lasai ikusi ditut, baikortasun gehiegikeriarik gabe edota helburua lehenbailehen lortzeko urduritasunik gabe. Egoten badakitela frogatu dute", izan da entrenatzailearen erantzuna.

Bihar osatuko du Realak Zubietan partida aurreko azken saioa.