Reala-Racing (1-0): Hirugarren garaipena jarraian lortu dute

Garaipen aparta lortu du Realak Racing Santanderren aurka, Joseba Llorenteren gol eder bati esker. Donostiarrek ondo kontrolatu dute markagailuan izan duten abantaila eta defentsan sendo egon dira. Txuri-urdinak Europako postuetan sartu dira jarraian lortutako hirugarren garaipenari esker.

Martin Lasarteren mutilek ondo hasi dute partida, lehen zatiko 6. minutuan lasaitasun handia eman dien 1-0ekoa lortuz. Xabi Prietok pase ikusgarria eman dio Joseba Llorenteri eta Hondarribiko aurrelariak ederki gainditu du Toño atezaina buruz burukoan. Markagailuan aurre hartzeak lasaitasun handia eman dio Realari eta baloiaren jabetza eta partidaren kontrola txuri-urdinek izan dute. Lehen zatiko 18. minutuan donostiarrek bigarren gola sartzeko aukera paregabea izan dute, baina Griezmannen jaurtiketa Toñoren atetik gora joan da desbideraturik.

Racing ez da ia Claudio Bravoren atera heldu lehen 25 minutuetan, baina 26. minutuan atezain txiletarrak geldiketa erabakigarria egin dio Arieli. Partidako 29. minutuan Alvarez Izquierdo epaileak bigarren txartel horia barkatu egin dio Pape Diopi, Zurutuzari sarrera itsusia egin ostean. Santanderreko taldeak gehiago sakatu du lehen zatiko azken 15 minutuetan, baina Realeko defentsa oso sendo egon da.

Bigarren zatian Miguel Angel Portugalen taldea erasora irten da, Reala atzean sartzen saiatuz, eta Santanderreko taldeak aukera arriskutsu batzuk sortu ditu. Kanpokoen abaguneak ez dira hain garbiak izan, ez direlako atera zuzenduta joan eta Bravok ez du geldiketa garrantzitsurik egin. Norgehiagokaren 60. minutuan Griezmannek 2-0ekoa izan du bere oinetan, baina Macongok erdilariaren zartakoa Toñok ederki gelditu du. Jokalari frantziarrak bakarrik hartu du baloia area barnean, baina Racingo atezainak geldiketa ikaragarria egin dio lau metrotara.

Griezmannen aukerak animaturik, Reala erasora joan da eta kantabriarren defentsa larri ibili da. Martin Lasarteren mutilek lan bikaina egin dute defentsan eta bigarren gola bilatu dute kontraerasoan. Llorentek bigarren gola egiteko aukera aparta izan du, baina Racingo defentsa batek azken unean lapurtu dio baloia Hondarribiako aurrelariari. Llorentek beste abagune garbi bat izan du bigarren zatiko 80. minutuan, baina Toñok, berriz ere, geldiketa bikain batez desbideratu du jaurtiketa. Partidako azken aukera Sarponek izan du, baina erdilari holandarraren zartakoa ez da atera zuzenduta joan.

Gipuzkoarrei lan asko eman die garaipena iztea eta azken minutuetan nahiko sufritu dute atzealdean. 1-0ekoarekin lortutako 3 puntuek Europako postuetan utzi dute Reala, beste partidetako emaitzen zain.

- Fitxa teknikoa:

1.- Reala: Bravo; Carlos Martinez, Labaka, Mikel González, De la Bella; Rivas, Aranburu (Estrada, min. 85), Xabi Prieto, Griezmann (Sarpong, min. 79), Zurutuza (Elustondo, min. 54); Joseba Llorente.

0.- Racing Santander: Toño; Enrique, Torrejon, Cisma, Francis; Colsa, Diop (Lacen,min. 41), Rosenberg, Munitis, Kennedy (Bedia, min. 68), Nahuelpan (Ivan Bolado,min. 58).

Gola: 1-0, min. 7: Joseba Llorente.