Reala
BBVA Liga
Deportivo-Reala, (2-1): Txuri-urdinen partida kaskarra eta porrota
Andoni Beldarrain
Erredakzioa
Talde galiziarrak hobeto jokatu eta gol aukera gehiago sortu ditu. Gipuzkoarrak 2-0 galtzen ari zirenean Agirretxek aldeak murritzu ditu 2-1koa eginez, baina hortxe geratu da Realaren erreakzioa.
Realak 2-1 galdu du Riazorren Deportivoren aurka eta UEFA Europa Leagueko postuetatik pixka bat aldendu da porrot honekin. Itxura kaskarra eskaini du talde txuri-urdinak.
Lehen zatian goitik behera nagusitu da Deportivo. Galiziarrak hasieratik baloiaren jabe izan dira eta Reala bere zelaian sartuta izan dute. Lehen minutuetan Bravok oso erne egon behar izan du gol aukerak eragozteko eta halako baten areatik irten behar izan da Guardadok baloia har ez zezan Adrianek emandako pase dotore baten ondoren. Geroago, area kanpoko jaurtiketekin saiatu zen Lotinak zuzentzen duen taldea, baina atera asmatu gabe. Ekin eta ekin ari zen Deportivo eta ekinak saria izan zuen 41. minutuan. Rikik area barruan baloia boleaz jo zuen eta Bravo gainditu zuen 1-0ekoa sartzeko. Gol honekin, lehen zatia 1-0eko emaitzarekin bukatu zen.
Atsedenalditik bueltan Reala sendoago eta gogo handiagoarekin zelairatu zen, baina Deportivo ondo jarrita zegoen berdegunean. Talde galiziarrak kontraeraso azkarra burutu zuen 57. minutuan eta Adrianek amaiera bikaina eman zion 2-0ekoa sartuz.
Gola hartu ondoren Realak erreakzio txiki bat izan zuen. Pare bat aldiz gerturatu zen Aranzubiaren ate ingurura eta 61. minutuan Agirretxek aldeak murriztu zituen gola sartuta. 2-1ekoa zen. Bazirudien Realak gora joko zuela berdinketaren bila, baina ez da hala izan. Deportivok ez du arazo gehiegirik izan azken ordu erdian eta azkenean Deportivoren aldeko 2-1eko emaitzarekin bukatu da partida. Hiru puntuak, beraz, Riazorren geratu ziren.
Fitxa teknikoa:
2 - Deportivo: Aranzubia; Laure, Colotto, Rochela, Morel; Antonio Tomas (Ruben Perez; min.65), Juan Rodríguez; Adrian, Michel, Guardado; eta Lassad (Riki; min.13. Desmarets; min.55).
1 - Reala: Bravo; Estrada, Ansotegi, Demidov, Mikel (De la Bella; min.62); Rivas (Sarpong; min.62), Illarramendi; Xabi Prieto, Zurutuza, Griezmann (Ifran; min.80); eta Agirretxe.
Golak: 1-0; min.41, Riki. 2-0; min.57, Adrián. 2-1; min.65, Agirretxe.
Epailea: Mateu Lahoz.
Horrela bizi izan dugu Realaren partida eitb.com-en
