Realak garaipenen boladara itzuli nahi du Getaferen aurka hiru puntuak lortuta

Realak Getafe izango du aurkari igande honetan, 18:30ean, Reale Arenan. Ligako zortzigarren jardunaldiko partida izango da jokoan, eta txuri-urdinek hiru puntuak eskuratu nahi dituzte geldialdia baino lehen.

Sevillaren aurka porrota jaso zuen Realak zazpigarren jardunaldian. Partida horretan Imanol Alguacilek atera zuen hamaikakoarekin alderatuta, aldaketak espero dira: Portuk eta Mikel Merinok hasieratik jokatuko dute, Januzajen eta Zurutuzaren ordez.

"Gogoa, gosea eta agresibitatea ditugula igarri behar da, eta zaleek ikus dezatela talde ausarta garela", esan zuen Imanol Alguacil Realeko entrenatzaileak partida honi buruz hitz egiterakoan.

Bestalde, Getafe Europa Ligan Krasnodarri irabaztetik (1-2) dator. Jose Bordalas entrenatzaileak deialditik at utzi zituen Mata, Jorge Molina eta Arambarri; gainera, Cucurellak minutu gutxi batzuk bakarrik jokatu zituen, eta Djenek eta Damian Suarezek ez zuten jokatu. Ondorioz, jokalari horiek guztiakArambarri izan ezik, hasierako hamaikakoan izango dira Realaren aurkako norgehiagokan.

Ustezko hamaikakoak:

Reala: Moya; Zaldua, Aritz, Llorente, Monreal; Zubeldia, Merino, Odegaard; Portu, Isak, Oyarzabal.

Getafe: David Soria; Damian Suarez, Djene, Cabrera, Nyom; Jason, Fajr, Maksimovic, Cucurella; Molina eta Mata.

Epailea: Gonzalez Fuertes.

Estadioa: Reale Arena.

Ordua: 18.30ean.