Realak puntu bat eskuratu du Betisen aurka

Realak bana (1-1) berdindu du Betisen aurka jokatu duen Primera Iberdrola Ligako 18. jardunaldiko partida. Ondorioz, 26 puntu ditu orain talde txuri-urdinak.

Hasiera ona eman dio Realak norgehiagokari, 7. minutuan gola sartu baitu Nerea Eizagirreren bitartez (0-1). Ondoren, partida parekatua izan da. Betis area kanpotik egindako jaurtiketen bitartez saiatu da arriskua sortzen, baina arrakastarik gabe. Bea Parrak izan du abagune argiena 28. minutuan, baina ez du ate aurrean asmatu. Talde txuri-urdina ez da abagune argirik sortzeko gauza izan, lehia kontrolpean izan duen arren.

Bigarren zatia, aldiz, oso gaizki hasi da Realarentzat, Bea Parrak banakoa (1-1) sartu baitu Betisentzat, bigarren minutuan. Oso abagune gutxikoa izan da neurketako bigarren zatia. Parekotasuna nagusi izan da, eta abagune esanguratsuena Betisen aldekoa izan da, 85. minutuan; Rosa Marquezek, ordea, ez dio amaiera ona eman Medinak egin duen jokaldi onari.