Itxi

2021/11/25

23:18

Reala

Europa Liga

Realak galdu egin du Monakoren aurka eta PSVri irabazi behar dio sailkapena lortu ahal izateko

A. B. E. | EITB Media

Talde txuri-urdinak porrota jaso du (2-1) Luis II.a estadioan jokatu duen Europa Ligako multzoen faseko bosgarren jardunaldiko partidan. Realari zaildu egin zaio Europa Ligako final-hamaseirenetarako sailkapena.

  • Badiashile eta Zaldua

    Badiashile eta Zaldua,lehin, Monako - REala partidan. Argazkia: EFE

  • Whatsapp
  • Whatsapp
  • Telegram
  • Bidali

Realak galdu egin du Monakoren aurka (2-1) ostegun honetan Luis II.a estadioan jokatu duen Europa Ligako multzoen faseko bosgarren jardunaldiko partida. Ondorioz, talde txuri-urdinak final-hamaseirenetara sailkatzeko duen aukera bakarra da azken jardunaldian PSVri irabaztea.

Monakok (11 puntu) B multzoko lidergoa bermatu du, eta hurrengo fasean egongo da. PSV (8 puntu) bigarren da, azken sailkatua den Sturm Grazi (1) irabazi egin baitio (2-0). Reala hirugarren postuan dago, 6 punturekin.

Lehen minutuak parekatuak izan dira, eta bi taldeetako bat ere ez da gai izan baloiaren jabetza lortzeko. Norgehiagokako lehen abagunea Monakok izan du, 7. minutuan, baina Ben Yedderren jaurtiketa gurutzatua kanpora joan da. Realaren erantzuna 25. minutuan iritsi da; Aihen Muñozek pase bikaina eman dio Januzaji, eta belgikarrak gora bota du errematea. Bi minutu geroago, Monakok baloia berreskuratu du zelai erdian, jokaldi azkarra antolatu du, eta Golovinek hegaletik eman duen pasea ate barruan sartu du Vollandek (1-0).

Talde txuri-urdinari asko kostatu zaio baloia jokatuta ateratzea, eta Monako nagusi izan da. Etxeko taldeak bigarren gola sartzeko aukera izan du 30. minutuan, baina Ryan atezainak desbideratu egin du Ben Yedderren jaurtiketa. Monako Reala baino hobeto jokatzen ibili da. Hala ere, talde txuri-urdinak partida berdintzea lortu du 35. minutuan: Januzajek pase bikaina egin, eta Isakek berdinketa jarri du markagailuan (1-1), Nübel atezaina maisuki gaindituta.

Pozak, ordea, ez dio asko iraun Realari, gola sartu eta bi minutura aurrea hartu baitu Monakok. Ezker hegaletik egindako erdiraketa Badiashilek ukitu du bigarren zutoinean, eta Fofanak 2-1ekoa egin du, atepean egin duen errematea Ryanen atean sartuta.

Erasokorrago zelairatu da Reala bigarren zatian, baina kostatu egin zaio abagune argiak sortzea. Imanol Alguacilek zuzentzen duen taldeak arriskua eraman du aurkariaren ate ingurura, nahiz eta jokaldiei amaiera ona ematea falta izan zaion. Realak 59. minutuan izan du norgehiagoka berdintzeko aukera. Merinok pase bikaina eman dio Isaki, suediarrak jaurtiketa egin du area barrutik, eta Nübel atezainak gola eragotzi du, baloia kornerrera desbideratuta.

Baloiaren jabe izan da talde txuri-urdina bigarren zatian. Monako taktikoki ondo kokatuta egon da, eta zulo gutxi utzi dizkio aurkariari. Nico Kovacek zuzentzen duen taldeak kontraerasoan egin nahi izan dio min Realari, eta neurketa erabakita uzteko abagune argia izan du 79. minutuan. Boaduk area kanpotik egin du jaurtiketa, eta kanpora joan da, gutxigatik.

Partidako 86. minutuan, Monako jokalari bat gutxiagorekin geratu da, Fofanak ostikoa eman diolako atzetik Turrientesi, eta epaileak txartel gorria atera baitio.

Erasora jotzen saiatu da talde gipuzkoarra azken txanpan, eta Oyarzabalek izan du neurketa berdintzeko aukera Monakok defentsan egin duen huts baten ostean, baina kapitainaren jaurtiketa kanpora joan da. Amaieran, Reala izan da galtzaile (2-1).

Fitxa teknikoa:

2 - Monako: Nübel, Sidibe, Maripan, Badiashile (Disasi, 67. min), Henrique; Fofana, Volland (Matsima, 90. min), Jean Lucas, Diop (Martins, 74. min); Golovin (Matazo, 90. min) eta Ben Yedder (Boadu, 74. min)

1 - Reala: Remiro; Zaldua (Gorosabel, 46. min), Le Normand, Aritz, Aihen Muñoz; Zubimendi, Merino (Turrientes, 66. min), Silva (Barrenetxea, 46. min); Oyarzabal, Isak (Sorloth, 72. min) eta Januzaj (Portu, 74. min).

Golak: 1-0, 27. min: Volland. 1-1, 35. min: Isak. 2-1, 37. min: Fofana.

Epailea: Ivan Kruziak (Eslovakia). Txartel gorria atera dio Fofana Monakoko jokalariari 86. minutuan. Txartel horiak atera dizkie Maripan, Golovin eta Nübel Monakoko futbolariei, baita Zaldua, Januzaj eta Zubimendi Realeko jokalariei ere.

  • Bisitatuena

      Kargatzen ikusiena
      Kargatzen ikusiena
    ;