Realak ez du salbazioa ziurtatu

Fitxa teknikoa:

Reala: Zubikarai; Estrada, Mikel Gonzalez, Ansotegi, De la Bella; Elustondo, Illarramendi (Aranburu, 76. minutua), Zurutuza, Griezmann, Vela; Agirretxe (Xabi Prieto, 71. minutua).

Betis: Fabricio; Amaya, Paulao, Chica, Nacho; Salva Sevilla (Pereira, 57. minutua), Iriney, Jefferson Montero (Matilla, 81. minutua), Cañas (Beñat, 57. minutua) Ruben Castro; Roque.

Golak: 1-0, 55. minutua: Carlos Vela. 1-1, 70. minutua: Ruben Castro.

Ruben Castrok sartutako golak berdinketa garrantzitsua eman dio Betisi Anoetan (1-1). Realak penalti bat huts egin du, eta horrek txuri-urdinen neurketa baldintzatu du. Horrela, donostiarrek ezin izan dute salbazioa oraindik ziurtatu, eta itxaron egin beharko dute.

Betisek Realak baino hobeto hasi du neurketa Anoetan eta baloia andaluziarren oinetan egon da aurreneko minutuetan. Hala ere, Betisek ez du arriskurik sortu eta txuri-urdinak pixkanaka-pixkanaka esnatu dira.

Horrela, Montanierren mutilek baloia eta partidaren kontrola bereganatu dute. Hala eta guztiz ere, Betisek aukera ona izan du kontraerasoan, baina Zubikaraik geldiketa bikaina egin dio Ruben Castrori, andaluziarren gola saihestuz.

Realak ere aukera paregabea izan du, baina Carlos Velak barkatu egin du. Aurrelari mexikarra kamuts aritu da Fabricioren aurrean eta Agirretxek ez du aldaratzea aprobetxatu. Hurrengo kornerrean epaileak penaltia adierazi du, Cañasek baloia eskuarekin ukitu duelako. Agirretxek penaltia huts egin du, txuri-urdinen abagunerik argiena.

Bigarren zatia parekatuagoa izan da, Betis atzeraxeago zelairatu eta Reala hobeto berdeguneratu da, baina donostiarrak errematean kamuts aritu dira.

Carlos Velak norgehiagoka bikaina borobildu eta saria 55. minutuan jaso du. Izan ere, denboraldiko hamargarren gola sartu du aurrelari mexikarrak. Arsenalera itzultzeko merituak egiten ari da Vela.

Reala jokorik onena egiten ari zenean Betisen berdinketa etorri da jokaldi azkar batean. Monterok baloia area batetik bestera eraman du eta Ruben Castrori pase ona sartu dio. Castrok ez du barkatu eta banakoa egin du.