Reala, etxean bezala Cazalegasen aurkako Kopako lehen partidan

Realak eta Cazalegasek igande honetan elkarren aurkako partida jokatuko duten Talavera de la Reinako El Prado zelaia eta talde donostiarra duela zenbait urtetatik elkartuta daude, zelai talaveranoak Anoeta zelai zaharreko 1.500 eserleku baititu.

Euskal entitateak eserlekuak dohaintzan eman zituen Anoeta birmoldatu zutenean eta orain, talaverar zelaiko alboko harmailan daude.

Jarlekuak 2019an heldu ziren Talavera de la Reinara, momentuan zegoen Talaverako presidenteak Realari Anoetako obrak igaro ondoren emateko eskatu baitzizkion herriko zelaiko kolore berekoak zirelako.

Reala 2017an hasi zen bere zelaia berritzen, eta 2019an bukatu zuen. Horri esker, Anoetako edukiera 40.000 ikusle gehiago izatera pasa zen atletismoko pistak kendu zituztelako.

Orain, Realako futbol zelaia 'Anoeta' deitzetik 'Real Arena' deitzera pasa da publizitate kontuengatik. Halaber, eserleku zaharrak futboleko lehen dibisioko baino kategoria baxuagoetako zelaietara eraman zituzten, Gipuzkoako Beasain taldeko Loinaz futbol zelaira edo Nafarroako Peña Sporteko San Franciskora, adibidez.

Anoetako jesarlekuei esker, 2019an El Prado udal zelaiko edukiera gehiagotu zen 5.000 esertokirekin eta oraindik ere bereizi ahal dira zeintzuk diren euskal klubak eman zituenak, eserleku bakoitzaren atzean "Unidos Siempre" jartzen duen Realako kamiseta eta zaleak irudikatzen dituen 12 zenbakiko pegatinak dituztelako.

Reala etxean bezala sentituko da asteburuan Errege Kopako lehenengo faseko Cazalegasen aurkako partida jokatzen duenean.