Borussia Dortmund-Napoli, hil ala biziko partida alemaniarrentzat

Astearte honetan Txapeldunen Ligako bosgarren jardunaldiko partidak jokatuko dira E, F, G eta H multzoetan. Gauza batzuk erabakita daude jada, baina beste asko erabakitzeke daude oraindik.

Jardunaldiko partida esanguratsuena Borussia Dortmundek eta Napolik jokatuko dute. Alemaniarrak F multzoko hirugarren postuan daude 6 punturekin eta Napoli bigarren sailkatua da bederatzi punturekin. Borussia Dortmundek garaipena behar du hurrengo fasera sailkatzeko aukerak izaten jarraitzeko. Multzo honetako liderra Arsenal da, 9 punturekin, eta ingelesek azken sailkatua eta punturik ez duen Olympique Marsellaren aurka jokatuko dute.

G multzoko jardunaldia 18:00etan hasiko da Zeniten eta Atletico Madrilen arteko partidarekin. Koltxoneroek multzoko ligergoa ziurtatuta dute, eta errusiarrak bigarren postuan dago, 5 punturekin. Multzoko beste partida hirugarren sailkatua den Portok (4 puntu) eta azken sailkatua den Austria Vienak (puntu bat) jokatuko dute.

Bartzelonak H multzoko lehen postua ziurtatu nahi du, eta horretarako garaipena lortu nahi du Ajaxen aurka Amsterdam Arenan. Ajax hirugarren sailkatua da, lau punturekin. Multzoko beste partidan, Celtic eta Milan ariko dira elkarren aurka Glasgown. Milan bigarren sailkatua da bost punturekin, eta Celtic azken sailkatua da, hiru punturekin. Celticek final-zortzirenetara sailkatzeko aukerak ditu oraindik.

E multzoan Chelseak du sailkapena lortzeko aukera. Talde ingelesa liderra da 9 punturekin, baina lehen jardunaldian Stanford Bridgen ezustekoa eman zuen Basel izango dute aurkari. Suitzako taldea hirugarren postuan dago, 5 punturekin. Bigarren sailkatua den Schalke 04k (6 puntu) azken sailkatua den Steaua Bucaresten (2 puntu) aurka jokatuko du Errumanian.