Txapeldunen Liga
Tottenham eta Inter garaituta
Txapeldunen Liga: Real Madril eta Schalke 04, finalerdietan dira
Andoni Beldarrain
Erredakzioa
Madrildarrek 0-1 irabazi diote Tottenhami eta joanekoan ere 4-0ekoarekin lortu zuten garaipena. Alemaniarrek, ordea, 2-5 irabazi zioten Interri joanekoan eta 2-1 irabazi dute itzulerakoan.
Real Madril eta Schalke 04 taldeek Txapeldunen Ligako finalerdietarako txartela lortu dute. Madrildarrek Bartzelona izango dute aurkari finalerdietan eta alemaniarrak Manchester Uniteden aurka ariko dira.
Schalke 04k 2-1 irabazi dio Internazionaleri eta Champions Leagueko txapelduna kanporatu du. Alemaniarrek abantaila lortu zuten joaneko partidan 2-5 irabazita. Itzulerako partidan Raulek sartu du 1-0ekoa. Ondoren, Mottak berdinketaren gola sartu du Interrentzat, baina italiarren erreakzioa ez da iritsi. Azken minutuetan Howedesek 2-1ekoa sartu du Raulen pase bikain bati esker eta emaitza horrekin bukatu da partida.
Bestalde, Real Madrilek, ez du arazorik izan Tottenham kanporatzeko. Santiago Bernabeun jokatu zen joaneko partidan 4-0 irabazi zuten madrildarrek. Itzulerakoan, Londresen, 0-1 irabazi du. Cristiano Ronaldo izan da golegilea. Urrunetik egin du jaurtiketa portugaldarrak eta Gomes atezainaren laguntzarekin sartu da baloia sare barrura.
