Tottenham eta Liverpool, nor baino nor gehiago Txapeldunen Ligaren bila

Tottenham Hotspurrek eta Liverpoolek bi talde ingelesen arteko Txapeldunen Ligako bigarren finala jokatuko dute larunbat honetan, Madrilgo Wanda Metropolitanon. Aurrekoa duela 11 urte izan zen, Chelsearen eta Manchester Uniteden artean.

Gutxik aurreikusiko zuten denboraldiaren hasieran Liverpool finalean egongo zenik bigarren urtez jarraian. Are gutxiago, ligaxkan etxetik kanpo galdu zituen hiru partidak kontuan hartuz gero, edota finalerdietan Camp Noun 3-0eko zaplaztekoa jaso ondoren.

Aitzitik, oraindik eta ezusteko handiagoa da Tottenham azken partida erabakigarrira iritsi izana. Manchester City era dramatikoan kaleratu zuten Pochettinoren mutilek, eta Amsterdam Arenan jazotakoarekin zale bat baino gehiagoren bihotza ahotik atera beharrean utzi zuten.

Londresekoen aldetik, Harry Kane aurrelariarengan daude jarrita begirada guztiak. Final-laurdenetako joaneko partidan ezker orkatilan hartu zuen min, eta bera da entrenatzaile argentinarraren zalantzarik nagusiena.

Tottenham ez da finala irabazteko faboritoa, lehen aldia da bertara iristea lortzen duena. Gehienez, finalerdietara sailkatzea lortu du orain arte, eta 1962an izan zen hori.

Hala ere, Kane berragertuko balitz, bultzada handia izango litzateke Spursentzat, nahiz eta Fernando Llorentek lan txukuna egin duen aurrelari titularraren hutsunea betetzen Metropolitanora iristeko bidean.

Liverpooli dagokionez, Naby Keita ginearrak ezin izango du jokatu Europako txapeldun bost aldiz izan den taldean. Aitzitik, Jurgen Klopp entrenatzaile alemaniarrak bueltan izango du Roberto Firmino aurrelari brasildarra.

Firmino hasierako hamaikakora itzuliz gero, Liverpoolek bere hiruhortzeko beldurgarria izango luke zelai gainean (Salah, Mane eta Firmino). Horrez gain, Georginio Wijnaldum herbeheretarrak ere lekua izan dezake hamaikakoan James Milnerren ordez.

Balizko hamaikakoak:

Tottenham Hotspur: Lloris, Trippier, Alderweireld, Vertonghen, Rose, Sissoko, Eriksen, Dier, Alli, Son eta Kane.

Liverpool: Alisson, Alexander-Arnold, Van Dijk, Matip, Robertson, Henderson, Wijnaldum, Fabinho, Mané, Firmino eta Salah.

Epailea: Damir Skomina (SLO).

Futbol-zelaia: Wanda Metropolitano.

Ordua: 21:00.