Txapeldunen Liga
Old Trafford futbol zelaian
Txapeldunen Liga: Manchester Unitedek eta Barçak jokatuko dute finala
Josu Bilbao
Erredakzioa
Fergusonen mutilek erraz (4-1) gainditu dute Schalke 04 talde alemaniarra. Lehen zatian Valenciak eta Gibsonek egin dituzte golak eta atsedenaldiaren ostean, Andersonek sartu ditu beste biak.
Manchester Unitedek eta Bartzelonak jokatuko dute Txapeldunen Ligako final handia. Sir Alex Fergusonen mutilek 4-1 gainditu dute Schalke 04 Old Trafforden eta ingelesek Wembleyko finala jokatuko dute.
Schalke 04 taldeak agindu du partidako lehen minutuetan, baina Manchester, apurka, norgehiagokaren pisua hartzen joan da. Lehen abagune argia alemaniarrek izan dute 7. minutuan, baina Farfanen jaurtiketa desbideratuta kanpora joan da. Schalkeren aukera izan ondoren, gorriek hegaletatik sortu dute arriskua eta Valenciak 1-0ekoa lortu du lehen zatiko 26. minutuan.
1-0ekoarekin, ingelesek partida ondo kontrolatu dute eta Gibsonek bigarrena lortu du Fergusonen taldearentzat (31. minutuan). Manchesterrek abantaila sendoa hartu du 2-0ekoarekin, baina Juradok 2-1ekoa jarri du markagailuan, gorriak ezustean hartuta. Atsedenaldira partida ondo bideratuta eraman du etxeko taldeak.
Bigarren zatian, alemaniarrak markagailua iraultzen saiatu dira, baina Fergusonen mutilak sendo mantendu dira defentsan. Protagonista bakarra izan da zelaian, Anderson jokalari brasildarra, sartu dituen bi golei esker garaipen erosoa lortu baitu Manchesterrek. Lehen gola norgehiagokaren 72. minutuan lortu du ezkerkada gogor batez, eta bigarrena Berbatoven pase zehatz baten ostean (75. minutuan) egin du Andersonek. Owenek 5-1eko lortzeko aukera paregabea izan du, baina aurrelari gorriaren zartakoz jotako baloia Neuer atezainak desbideratu du.
Emaitza honekin (6-1, kanporaketa osoari begira) ingelesek finalerako txartela eskuratu dute eta Guardiolaren Bartzelona izango dute aurkari Wembleyen.
- Fitxa teknikoa:
4 - Manchester United: Van der Sar; Rafael (Evra, 60. minutuan), Smalling, Evans, O''Shea; Gibson, Scholes (Fletcher, 73. minutuan), Anderson; Valencia, Berbatov (Owen, 77. minutuan), Nani.
1 - Schalke 04: Neuer; Uchida, Höwedes (Huntelaar, 70. minutuan), Metzelder, Escudero; Papadopoulos, Baumjohann (Edu, 46. minutuan); Farfan (Matip, 72. minutuan) Jurado, Draxler; Raul.
Golak: 1-0: 26. minutuan: Valencia. 2-0: 31. minutuan: Gibson. 2-1: 35. minutuan: Jurado. 3-1: 72. minutuan: Anderson, 4-1: 76. minutuan: Anderson.
